Prezidente APORTIL, Flavio Cardoso Neves. Imajen/Antonio Goncalves.

DILI, 06 dezembru 2020 (TATOLI) – Feriadu Natál 2019 no tinan foun 2020 afeta ba manutensaun ró Nakroma atu fila mai Timor-Leste iha 28 dezembru 2019.

“Loloos ró Nakroma mai iha 28 dezembru 2019, maibé labele mai tanba ita hatene feriadu ba Natál no tinan foun nian ne’ebé tékniku sira ne’ebé halo manutensaun mós feriadu hotu ne’ebé la konsege mai iha 28 dezembru ne’e, mas teknikamente manutensaun jerál remata ona 100%”, Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, ba TATOLI iha knaar fatin, ohin.

Flávio Cardoso dehan, ohin, tuku 11:00 oras Surabaya iha kontaktu ona husi tékniku sira katak daudaun ró Nakroma hatún ona bá tasi hodi halo inspesaun no teste nia mákina.

“Ha’u ohin kontaktu ona ekipa téknika sira no sira komesa hatún ona ró bá tasi hodi hala’o teste ba instalasaun mákina ró Nakroma ne’ebé posibilidade aban no bainrua bele star ona husi Surabaya mai Dili”, katak.

Nia dehan teste instalasaun ró Nakroma mak deteta iha fallansu ruma ne’ebé presiza hadi’a entaun kontinua hadi’a tanba hakarak ró mai ho kondisaun di’ak.

“Ohin halo teste no ita-nia tékniku na’in-lima mak akompaña ba mákina mak laiha fallansu, ró bele arranka ona husi Surabaya mai Timor-Leste”, garante.

Maibé, nia dehan data fiksu ba ró Nakroma atu mai Timor-Leste seidauk klaru tanba sei halo teste ba mákina ró nian.

“Ita garante semana ne’e nia laran ró bele to’o Timor-Leste, maibé data fiksu ha’u labele fó tanba sei halo teste mákina, sira kontaktu mak ha’u informa fali”, salienta.

Nia espera katak Nakroma sei to’o iha Timor-Leste iha janeiru ne’e hodi halo operasaun  ba Oe-Cusse no Atauro.

Prezidente APORTIL ne’e adianta, Nakroma mai trade uitoan, tanba APORTIL ho objetivu ida atu hadi’a kondisaun ho di’ak atu ró to’o mai labele iha fallansu ruma hodi gasta osan arbiru.

Hatán ba orsamentu adisionál, nia salienta daudaun orsamentu ne’e nafatin ho montante rihun $226 ne’ebé asina ho kompañia Ben Santoso, mas posibilidade iha ona orsamentu adisionál.

“Adisionál seidauk fiksu, maibé posibilidade iha adisionál mas ita hein dokumentu husi kompañia ne’ebé hetan akompañamentu husi ekipa APORTIL to’o mai mak ita haree no analiza dokumentu hodi hatene ne’e orsamentu adisionál ne’e hira”, haktenik.

APROTIL mós sei analiza didi’ak tanba Diresaun Nasionál Transporte Marítima Klasifikasaun hamutuk ho Biro Indonézia halo inspesaun iha ró Nakroma katak teknikamente ba manutensaun ró ne’e mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

APORTIL kontinua koordena ho ró Sukses atu aumenta frekuénsia operasaun ba Oe-Cusse no Atauro atubele fasilita movimentu populasaun nian

APORTIL kontratu ho kompañia Ben Santoso husi Indonézia bá halo manutensaun iha Surabaya-Indonézia iha 30 setembru ho totál orsamentu $226.000.

Notísia relevante : 28 Dezembru, Nakroma To’o ona Timor-Leste

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Manutensaun ba fulan 3 ho balun kedas ka..hau sinte persiza fo informasaun klaru ba publiku..sei tinan-tinan persija fulan tolu resin ba manutensaun ne’e la efisiente. Governu tenki foti medidas ruma hodi resolve kestaun ne’e. Povu persija halo viajem ba-mai Dili-Oecusse-Atauro.
    Segundu, Favor mos hadia klaru fatin faan bihlete ne’e, foti ezemplu Success nian, fatin klaru, ida ne’e Ro suporta hosi guvernu mas fatin faan tiket att los. Tinan foun ne’e hadia ba.
    Obrigado espera sujestaun sira ne’e be;e fo atensaun !!!

HAKEREK NO HATÁN

Please enter your comment!
Please enter your name here