Sesaun plenária Parlamentu Nasionál. Imaje /TATOLI

DILI, 3 janeiru 2020 (TATOLI) – Parlamentu Nasionál (PN) sei hahú Audiénsia Públika ba Proposta Lei foun Lei no.9/V (2a) Orsamentu Jerál Estadu (OJE) ho montante biliaun $1,668, durante loron lima, hahú iha segunda (06/01) to’o sesta (10/01).

Nune’e, iha loron ne’ebé konklui audiénsia, komisaun sira elabora relatóriu pareser durante loron lima, hafoin iha loron 14 janeiru komisaun sei aprezenta relatóriu ba meza PN.

Notísia Relevante: PN Sei Debate Proposta Lei OJE 2020 Foun ho Karakter Urjénsia

Tuir mai, diskusaun no votasaun iha jeneralidade sei realiza durante loron 3, hahú hosi loron 15 to’o 17 janeiru.

Nune’e mós, diskusaun no votasaun iha espesializada no finál global sei realiza durante loron 10, hahú hosi 20 to’o 30 janeiru.

Hafoin konklui, Redasaun Final Proposta Lei OJE 2020 foun sei haruka ba Prezidente Repúblika, Francisco Guterres Lú Olo iha loron 31 janeiru.

Molok ne’e, iha debate loron daruak jeneralidade iha loron 3 dezembru 2019, Primeiru-Ministru, Taur Matan Ruak deside retira Proposta Lei OJE 2020 ho montante biliaun $1,950, ho razaun hakarak ajusta no akomoda preokupasaun deputadu sira, tantu hosi Bankada Governu no Opozisaun, ne’ebé kestiona maka’as kona-ba montante osan ne’ebé mak boot.

PN iha loron 23 dezembru 2019, liuhosi diskusaun iha plenária, aprova ona pedidu hosi Governu, hodi halo debate ho karakter urjénsia ba Proposta Lei no.9/V(2ª) OJE 2020 foun iha janeiru 2020.

Hafoin diskusaun, pedidu ne’ebé fó sai hosi Komisaun C ne’ebé trata Asuntu Finansa Públika liuhosi rezultadu finál relatóriu pareser, konsege hetan aprovasaun ho votu maioria a-favór 37, maibé Bankada FRETILIN deside la hiit kartaun.

Rekomendasaun hosi Komisaun C kona-ba debate urjénsia mak hanesan, prazu ezame komisaun no produsaun pareser durante loron 5, pareser komisaun durante loron 7 iha loron úteis, limite debate jeneralidade másimu loron 3, limite debate espesialidade loron 7 no redasaun finál loron 2.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here