Xefe Suku Soba, Francisca Monica de Fátima Soares. Imajen Tatoli/Felicidade Ximenes.

LAGA, 03 janeiru 2019 (TATOLI)-Aldeia haat hanesan Asanunu, Fatiliri, Boleha no Laikua iha Suku Soba, Postu Administrativu Laga, Munisípiu Baucau seidauk asesu infraestrutura bázika hanesan estrada, eletrisidade, bee moos inklui saúde.

“Tinan tolu ona komunidade seidauk sente dezenvolvimentu ne’ebé mak di’ak hanesan infraestutura bázika; bee moos, eletrisidade estrada no saúde. Ami iha suku soba iha aldeia neen maibé iha aldeia rua iha Laga vila ne’e asesu ba bee moos tanba bee moos iha rua, ida bomba, ida sistema gravitasaun. Tanba ne’e, aldeia rua asesu ho di’ak maibé iha mós mudansa klimátika entaun bee bele maran” informa Xefe Suku Soba, Francisca Monica de Fátima Soares, iha nia rezidénsia ba Agência TATOLI, ohin.

 “Maibé iha aldeia haat ne’ebé dook husi suku soba ne’e mak aldeia Asanunu, Fatiliri, Boleha no Laikua ne’e sira susar ba bee tanba bee-matan mós dook entaun susar tebes ba sira atu konsumu bee moos ho di’ak. Sira ba kuru iha bee matan ho kilometru ne’ebé mak dook tebes,” reforsa tan autoridade lokál ne’e.

Kona-ba bee moos, Xefe Suku Francisca Monica de Fátima Soares informa katak aldeia rua hanesan Asanunu no Fatiliri mak seidauk asesu ho di’ak. Enkuantu, aldeia rua hanesan Boleha no Laikua asesu ona.

Liña eletrisidade nian, aldeia haat hanesan Asanunu, Fatiliri, Boleha no Laikua seidauk asesu. Alende ne’e mós, liga ba Sentru saúde iha aldeia rua; Laga vila asesu hotu ba iha sentru saúde Laga maibé iha aldeia haat asesu ba iha postu saúde deit. Ambulánsia ne’ebé mak iha Postu Saúde Laga nian avaria tinan ida ho balun ona.

“Entaun nia impaktu ne’e ba inan isin-rua sira hanesan ezemplu ema iha área remota mak mai sira aluga karreta foin to’o iha sentru saúde maibé ita haree ema ne’e kbiit laek ida depois aluga karreta ho montante ne’ebé mak boot hanesan 50 dolar entaun sira lakon hira ba nesesidade hirak ne’e no ekonomia mos la sufisiente ba sira,” konsidera xefe suku ne’e.

Tanba ne’e, Xefe Suku Soba, Francisca Monica de Fátima Soares husu ba ministériu relevante sira no mós Ministériu Saúde (MS) atu presta atensaun maka’as ba komunidade nia preokupasaun tanba durante ne’e dalabarak ambulánsia la iha sira uza de’it administradór postu administrativu nian nune’e mós komandante eskuadra polísia Laga nian hodi ajuda komunidade.

Notísia relevante:Governu Propoen Millaun $317-Resin Dezenvolve Infraestrutura

Jornalista            : Felicidade Ximenes

Editór                    : Rafy Belo

HAKEREK NO HATÁN

Please enter your comment!
Please enter your name here