Branch Manager Kaebauk Investimentu Finanseiru (KIF) iha Munisípiu Lautem, Carlito Garcia. Imajen/Florencio M. Ximenes.

LAUTEM, 02 janeiru 2020 (TATOLI) – Branch Manager Kaebauk Investimentu Finanseiru (KIF) iha Munisípiu Lautem, Carlito Garcia, hatete hahú janeiru to’o dezembru 2019 rejista ona kliente 660.

“Ami-nia kliente iha tinan kotuk (2019) hamutuk ona 660, mas totál ne’e tun-sa’e tanba balun sai kliente no balun sai”, Carlito dehan ba TATOLI iha knaar fatin, Lospalos, ohin.

Nia salienta utente hirak ne’e husi postu administrativu lima hanesan, Lospalos, Luro, Iliomar, Tutuala no Lautem.

“Ami-nia kliente sira mak halo ona kréditu osan hahú husi $100 to’o rihun $35″, katak.

Nia observa kliente 660 ne’e kuaze susesu hotu tanba haree ba atividade negósiu ne’ebé halo husi kliente sira la’o di’ak tebes.

“Ami observa negósiu ne’ebé kliente sira halo la’o di’ak no susesu hotu ne’ebé ami kontente tanba ami fó kreditu ka osan, maibé fó mudansa ba sira-nia moris”, afirma.

Kritéria fó kreditu ba kliente sira mak hanesan selu oan nia eskola, fa’an modo, loke kioske, loja no atividade ekonómika sira seluk. Enkuantu, ekipa KIF simu proposta no rejistu hodi halo verfikasaun no entrevista kliente iha terrenu hafoin prosesa hodi aprova no entrega osan ba kliente tuir proposta ne’ebé hatama.

KIF mós fó treinamentu ba kliente sira ne’ebé nia propost hetan ona aprovasaun atu hala’o kréditu liuliu formasaun ba jestaun finaseira.

“Ami fó mini formasaun atu kliente sira bele hatene jere orsamentu hodi bele jere osan ho di’ak atu nesesita moris loroloron nian”, dehan.

Kliente ne’ebé kréditu osan $1.000 no tuir kontratu selu hotu tinan ida ne’e kada fulan hatama osan  posentu 1.50%.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here