Prezidente Asosiasaun Tane Konsumidór, António Ramos da Silva ‘Naikoli’. Imajen Tatoli/Nelson de Sousa

DILI, 30 dezembru 2019 (TATOLI) – Prezidente Asosiasaun Tane Konsumidór, António Ramos da Silva, husu ba Governu atu halo ona intervensaun ba folin billete aviaun Dili-Denpasar no Dili-Darwin tanba kustu billete karun tebes hodi halo pasajeiru labele halo viajen iha loron boot.

“Durante ne’e ami simu keixa husi konsumidór sira liuhusi online hamutuk na’in-100, sira-nia lamentasaun ne’e maioria kona-ba folin tikete aviaun Dili-Denpasar no Dili-Darwin ne’ebé karun tebes”, nia dehan ba Ajénsia TATOLI iha Vila Verde, ohin.

Tanba ne’e, Asosiasaun Tane Konsumidór tuir dekretu lei númeru 8/2016 ne’ebé defende direitu konsumidór sira husu atu Governu tenke halo intervensaun ba presu billete aviaun nian iha Timor-Leste.

Nia haktuir, iha fulan kotuk bazeia ba estudu ne’ebé Tane Konsumidór halo ba folin billete aviaun Sriwijaya vou Dili-Denpasar ho presu $200 no Denpasar-Dili $200-resin, enkuantu vou Citilink Dili-Denpasar $200-resin Denpasar-Dili $300.

Nune’e iha fulan agora (dezembru), tanba loron boot tuir konsumidor sira fó hatene ba Tane Konsumidór, aviaun Sriwijaya husi Dili-Denpasar $210 no Denpasar-Dili $307, ba vou Citilink nian Dili-Denpasar $207 no husi Denpasar-Dili agora ne’e $318 .

Enkuantu Dili-Darwin ho aviaun Airnorth nia presu $400 no bele to’o $500.

“Se folin nune’e, husi ami-nia analiza sira, ministru ka ema sira iha kapasidade finanseira maka bele halo viajen”, António Ramos dehan.

Hodi hatutan: “Ita-nia Governu ko’alia promove turizmu hodi lori retornu di’ak ba ita-nia rai, enkauntu ita-nian presu billete aviaun, ida ne’e difísil ita ko’alia kona-ba promove turizmu”, katak.

Nia dehan realidade agora otél sira ema la mai, mamuk hela, limite ema nia sirkulasaun, no ho folin billete ne’ebé karun prejudika ekonomia nasionál.

“Tanba ne’e, Governu liuliu Ministériu Transporte no komunikasaun no Autoridade Aviasaun Sivíl Timor-Leste (AACTL, sigla portugés) tenke haree hodi rezolve problema billete aviaun”, sujere.

Prezidente Tane Konsumidór ne’e salienta sobre folin tikete, iha janeiru 2020 sei hato’o rekomendasaun balun ba Governu atubele foti desizaun imediata hodi intervene.

“Ami sei hato’o preokupasaun husi konsumidór sira ne’e ba Governu ho rekomendasaun balun aprezenta ba Governu atu intervene presu billete hodi define presu loloos tanba presu agora karun tebes”, António katak.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here