Membru Polísia Nasionál Timor-Leste (PNTL) Munisípiu Manatuto no FALINTIL-Forsa Defeza Timor-Leste (F-FDTL) hala'o parada antes tun ba terrenu hodi asegura selebrasaun tinan foun 2020, iha Munisípiu Manatuto, domingu (29/12/19). Imajen/PNTL Manatuto.

MANATUTO, 29 dezembru 2019 (TATOLI) – Polísia Nasionál Timor-Leste (PNTL) Munisípiu Manatuto servisu hamutuk ho FALINTIL-Forsa Defeza Timor-Leste (F-FDTL) hodi asegura seguransa iha loron boot tinan foun 2020.

Kooperasaun ne’e hala’o liuhusi parada konjunta ne’ebé lidera hosi Segundu Komandante PNTL Munisípiu Manatuto, Superintendente Asistente Polísia Joni Viana iha Komando Polísia munisípiu refere.

Segundu Komandante PNTL Munisípiu Manatuto Joni Viana husu ba forsa rua ne’e atu fó seguransa di’ak, nune’e komunidade bele festeza loron boot ho hakmatek.

“Objetivu husi parada konjuta ne’e maka atu asegura iha selebrasaun loron boot tinan foun 2020, nune’e populasaun sira bele festeza ho di’ak no hakmatek”, Superintendente Asistente Polísia ne’e dehan iha ámbitu parada konjunta ne’ebé hala’o iha komando Polísia Manatuto, ohin.

Hodi afirma, membru Polisía no F-FDTL hosi komponente Sentru Formasaun no Treinamentu Metinaro ne’e konsentra iha komando Manatuto, depois halo patrullamentu ba iha postu administrativu sira ne’ebé identifika risku ba konflitu.

Tuir Joni Viana postu administrativu no fatin ne’ebé identifika risku konflitu iha loron boot maka Postu Administrativu Laleia, Postu Administrativu Natarbora no área tasi ibun Behau.

Durante operasaun konjunta, forsa rua ne’e koopera mós ho autoridade lokál no veteranu iha munisípiu ne’e.

Membru Polisía hosi Komando Munisípiu Manatuto hamutuk 23 lidera hosi Inspetora Polísia Guilhermina Gomes, F-FDTL hosi komponente Sentru Formasaun no Treinamentu hamutuk 30 lidera hosi Tenente Jaime Martins.

Operasaun konjunta ne’e hahú iha 10 dezembru 2019 no sei remata iha 5 janeiru 2020. Daudaun ne’e, seguransa iha Munisípiu Manatuto la’o hakmatek no kontroladu.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here