Deputada Bankada CNRT no Prezidente Komisaun G, Albina Marçal Freitas. Imajen espesiál

DILI, 29 dezembru 2019 (TATOLI) – Iha tinan 2019 nia rohan, Parlamentu Nasionál (PN) iha lutu nia laran tanba lakon Deputada Bankada CNRT, Albina Marçal Freitas ‘Bia Shana Falu’, ne’ebé hakotu iis iha madrugada ne’e, iha Ospitál Nasionál Guido Valadares (HNGV-sigla portugués) tanba sofre moras kankru.

Prezidente Parlamentu Nasionál (PPN), Arão Noé de Jesus da Costa Amaral, sente hakfodak no lakon boot bainhira rona lia rekadu, tanba Deputada ne’e ativu tebes.

“Kuandu rona Deputada Albina nia mate, Parlamentu Nasionál sente lakon boot. Deputada Albina durante V Lejizlatura hanesan Prezidente Komisaun G ne’ebé ativu tebes iha programa Parlamentu, tanba ne’e Parlamentu sente lakon boot tebes”, haktuir PPN ba Agência TATOLI, domingu ne’e.

Tuir Arão, PN hanesan bain-bain kuandu iha membru ida mak mate, sempre iha preparasaun lubuk ida ne’ebé tenke halo, hahú hosi fó asisténsia ruma ba prosesu fúnebre, hasa’e Bandeira Nasionál meia aste iha edifísiu PN nia oin, realiza sesaun plenária hodi aprova votu pezar inklui omenajen no sesaun solene iha plenária.

“Maibé ba Saudoza Deputada Albina nian labele realiza sesaun hirak ne’e hotu tanba família deside lori ba kedas Lospalos. Maibé Parlamentu Nasionál sei hala’o de’it pontu balun hanesan apoiu ba prosesu fúnebre, hasa’e Bandeira Nasionál meia aste durante loron tolu, aprova votu pezar no partisipa iha serimónia interru nian”, Akresenta líder másimu Parlamentu.

Maski nune’e, nia dehan PN rasik seidauk simu ofisialmente oráriu fúnebre maibé konfirma ona ho família katak bainhira mate-isin to’o ona iha Lospalos mak família sei prepara kalendáriu no hato’o ba PN.

“Agora Parlamentu iha hela feriadu ba períodu natalísiu nian, maibé sei konsege karik Parlamentu sei buka tempu atu ajenda no organiza plenária ida hodi aprova votu pezar”, nia dehan tan.

Tuir PPN, kuandu rona Deputada Albina moras, PN halo esforsu haruka ba halo tratamentu saúde iha ospitál Manipal, Malázia durante fulan ida.

Nune’e, nia haktuir, bainhira alta no fila mai Timór, liu tiha fulan balun moras fali, entaun  PN serbisu hamutuk ho Sekretaria Estadu Asuntu Veteranu no Antigu Kombatente Libertasaun Nasionál no Ministériu Saúde, hodi haruka fali ba halo tratamentu iha ospitál Mounth Elizabeth, Singapura durante fulan ida.

“Bainhira alta, fila mai Timór ho rekomendasaun doutór katak fulan rua mak fila ba Singapura hodi halo check up fali. Ita bele halo esforsu hotu maibé distinu mak nune’e ona. Parlamentu husu deskulpa ba família no hato’o sentidu de kondolénsia profunda ba família em lutada”, PPN subliña.

Deputada Albina Marçal Freitas ho naran kódiku ‘Bia Shana Falu’, moris iha loron 12 fevereiru 1958 iha suku Bauro, postu administrativu Lospalos, munisípiu Lautem.

Atuál Prezidente Komisaun G ne’ebé trata asuntu Edukasaun, Juventude, kultura no sidadania ne’e, hahú ninia kna’ar hanesan Deputada Bankada CNRT iha loron 30 jullu 2012, iha III lejizlatura.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here