Diretór DNDI SEKOMS, Estevão Belo.Imajen/ Tatoli Egas Cristovao

ERMERA, 28 dezembru 2019 (TATOLI)-Sekretáriu Estadu Komunikasaun Sosiál liuhusi nia reprezentante, Diretór Nasionál Diseminasaun Informasaun (DNDI), Estevão da Costa Belo, inaugural sentru informasaun suku rural iha Batumanu, Postu Administrativu Atsabe, Munisípiu Ermera.

Diretór DNDI, Estevão da Costa Belo, hateten, harii Sentru informasaun sira iha Suku rurál nu’udar atividade ida iha prioridade sira ne’ebé define ona iha DNDI, liuliu iha sub-programa Governu iha Povu nia Leet, Naroman ba Suku.

“Atividade prinsipál sira iha Sentru informasaun suku rurál sira ne’e maka halibur, prodús no divulga informasaun ba populasaun sira iha nivel suku,” Diretór Estevão Belo hateten iha diskursu iha Suku Batumanu, Postu Administrativu Atsabe, Munisípiu Ermera, ohin.

Nia haklaken, promove atividade jornalizmu komunitária nu’udár dalan halibur no kanaliza informasaun iha suku laran no hosi suku laran ba Governu ka Estadu, promove poténsia turizmu, kulturál no poténsia agrikultura nian sira iha suku laran, harii biblioteka iha sentru laran hodi fornese livru no informasaun oioin ba agrikultór sira, estudante, juventude feto, mane no entidade sira seluk ne’ebé pertense iha suku laran.

Tanba ne’e, Diretór DNDI ne’e husu ba autoridade suku sira no koordenadór sentru informasaun sira atu tau-matan no kuidadu didi’ak ekipamentu sira iha ne’e, tanba ekipamentu sira ne’e sosa ho osan povu ninian.

Ezekutivu ne’e haktuir katak serimónia inaugurasaun ba sentru informasaun iha suku Batumanu ne’e, nu’udar kontinuasaun hosi atividade lansamentu programa Governu iha povu nia leet, Naroman ba Suku, ne’ebé SEKOMS lansa tiha ona iha fulan outubru liubá.

Antes organiza serimónia inaugurasaun ba sentru sira ne’e, SEKOMS transfere uluk ona fundus ba Suku Batumanu ne’e, hodi halo instalasaun ekipamentu informátika ba sentru, organiza formasaun kona-ba Jestaun no Citizens Journalism no verba ba serimónia inaugurasaun ne’e rasik.

Diretor DNDI informa tan, liuhusi orsamentu trasferénsia públiku ida ne’e mak sosa ona ekipamentu para haree didi’ak ekipamentu hodi uza ba nesesidade nasionál nian.

Labele uza ba nesesidade privadu nian hanesan grupu ka indivuduál nian maibé ekipamentu sira ne’ebé sosa ona rai didi’ak, kuidadu didi’ak tanba ekipamentu sira ne’e la’ós ema seluk nia maibé ne’e povu Batumanu nia osan mak sosa.

Hanesan iha suku Batumanu ne’e rasik turismu komunitária mak priorodade tanba ne’e mak ekipamentu hirak ne’e bele fó sai ba públiku too iha nasionál no mós internasionál katak suku Batumanu ne’e iha buat barak maibé ema la hatene tanba nee mak uza ekipamentu ho kuidadu.

“Ha’u husu mós ba administradór no xefe suku no koordenadór sentru informasaun bele tau-matan ba ekipamentu sira ne’e no sentru informasaun la’ós para iha ne’e deit maibé sei iha tan programa seluk sei tuir mai iha tinan-2020”.

Iha fatin hanesan, Koordenadór sentru informasaun suku rurál Batumanu, André Augusto relata, orsamentu ne’ebé trasferénsia husi SEKOMS ba iha Suku Hatumanu ho montante 10.235 no gastu ba ekipamentu sira hamutuk 8.235 no agora daudaun saldo iha ita-nia liman mak 2.000.

“Orsamentu hirak ne’ebé sosa ekipamentu mak hanesan Laptop ida, printer (impresora) ida, komputadór ida, projetór ida, meza servisu rua, meza reuniaun ida, kadeira servisu nian haat. Membru ne’ebé mak servisu voluntáriu ba sentru informasaun ne’e hamutuk na’in neen maibé na’in tolu deit mak ativu no na’in tolu seluk la ativu.

Entretantu, partisipa iha inaugurasaun Sentru Informasaun Suku Rurál Batumanu ne’e mak autoridade lokál, Administradór Postu Administrativu Atsabe, Ofisiál Polísia Suku (OPS) inklui komunidade iha Suku Batumanu.

Jornalista    : Felicidade Ximenes

Editór          : Rafy Belo

HAKEREK NO HATÁN

Please enter your comment!
Please enter your name here