Prezidente Repúblika, Francisco Guterres Lú Olo. Imajen Tatoli/António Gonçalves

DILI, 28 dezembru 2019 (TATOLI) – Tinan 2019 besik ramata ona, Prezidente Repúblika (PR), Francisco Guterres Lú Olo agradese ba povu Timor-Leste tantu iha rai laran, estranjeiru, no entidade hotu nia konfiansa, estabilidade, pás no domin iha rai ne’e.

Xefe Estadu hato’o agradesimentu liuhosi mensajen tinan foun 2020 iha Palásiu Prezidensiál, Bairro Pité, sábadu ne’e.

“Ha’u nia votu ba Tinan Foun 2020 nakonu ho saúde hamutuk ho família no belun sira no ha’u hein katak hotu-hotu bele realiza nia mehi ho domin, pás, seguransa no estabilidade iha ita nia rai Timor-Leste. Ba imi hotu, ha’u agradese ho laran haksolok, servisu no dedikasaun tomak ne’ebé imi fó durante tinan 2019, ne’ebé besik atu ramata hodi garante pás no estabilidade iha ita-nia nia rai doben. Orgullu boot ba Timór-oan tomak”, mensajen PR Lú Olo ba tinan foun nian.

Nia hatutan, maski hasoru dezafiu barak, nu’udar Povu no Estadu, nune’e mós nu’udar ema moris iha mundu ida ne’ebé ko’alia barak kona-ba direitu, étika, pás no diálogu, maibé hasoru hela konflitu, dezigualdade no inserteza iha fatin barak.

“Ita, nu’udar Timór-oan, tenke hatene buka dalan atu hakat-liu dezafiu sira ne’e liuhosi valór, prinsípiu no matenek ne’ebé orienta ita durante luta libertasaun nasionál to’o ita hetan ukun rasik-aan. Valór ne’ebé konsagra iha ita-nia Estadu Direitu Demokrátiku hanesan liberdade, pluralizmu, justisa sosiál no igualdade”, nia akresenta.

Aman nasaun ne’e fó hanoin katak iha tinan tuan 2019, Timor-Leste selebra eventu bo’ot no istóriku rua ne’ebé marka perkursu nu’udar Povu no Nasaun ida, mak Referendu ne’ebé tinan 20 ba kotuk loke dalan ba povu ida-ne’e atu moris nu’udar País livre no independente, no seluk mak selebrasaun tinan 30 vizita husi Papa S.João Paulo II iha tempu susar nia laran.

“Dalan ida ne’ebé nakonu ho dezafiu no inserteza maibé ita hasoru ho barani, determinasaun no unidade. Ha’u fiar katak ita sei nafatin hasoru dezafiu oioin, maibé mós ho serteza katak ita sei hakat liu ho ita hotu nia vontade no matenek atu fó resposta loloos”, nia subliña.

Nune’e, Xefe Estadu husu ba família hotu iha rai laran no iha rai liur atu kuda valór sira-ne’e, iha ida-idak nia uma laran, tanba família mak instituisaun ne’ebé importante liu hodi hahú forma karaktér umanu nian.

Nia salienta, bainhira iha família laran kuda valór hanesan hadomi malu, respeita malu, no ko’alia ba malu, mak bele iha serteza katak sei iha sosiedade ida justa no solidária ho sidadaun sira ne’ebé moris ho haksolok.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here