Prezidente TATOLI, I.P, José da Costa. Imajen Tatoli/Egas Cristóvão.

DILI, 27 dezembru 2019 (TATOLI) – Iha nivel makro, TATOLI halo ona balansu iha publikasaun notísia sira no liuliu informasaun li husi númeru notísia ne’ebé progresivamente sa’e husi 200 iha janeiru 2019 ba 600 iha novembru 2019, no totál iha tinan 2019 ami konsege publika notísia hamutuk 5.319. Númeru ida ne’e sa’e kuaze porsentu 59 kompara ho totál notísia ne’ebé prodús iha 2018.

Señór no Señora, Eselénsia

Uluk nia na’in permite, atu ha’u lori kolega sira hotu no TATOLI nia naran, hato’o ami-nia saudasaun no benvindu, ba ilustre konvidadu sira hotu nia prezensa iha loraik kmanek ida ne’e, no hato’o mós kontinuasaun feliz Natál nian ba ita-boot sira no ba ita-boot sira-nia família.

Iha loro-kraik kmanek ida ne’e, ita hotu sei sai sasin ba lansamentu livru rua (2) ne’ebé prodús husi kolega sira iha TATOLI; 1). Livru kona-ba TATOLI nia jornada sira, ne’ebé kolega sira hanaran “TATOLI Nia Ain-Le’ut” no 2.) Livru foto ne’ebé kolega sira fó naran “LALATAK”. Reprezentante autór sira sei ko’alia kona-ba livru hirak ne’e nia konteúdu no saida mak ita-boot sira bele haree iha livru hirak ne’e nia laran.

Maske nune’e, ho permisaun autór no ita-boot sira hotu, ha’u sei ko’alia uitoan kona-ba esforsu no prosesu hirak ne’ebé konsege, to’o finalizasaun livru hirak ne’ebé ita sei ba asiste iha minutu balun tuirmai.

Señór no Señora, Eselénsia

Iha duni outubru (Fulan 2 ba kotuk) mak ha’u orienta ekipa ki’ik ida ne’ebé fó naran “Team 7” (tamba ema na’in-7) atu hahú diskute, hanoin no soe ideia oinsá mak bele hakerek buat ruma kona-ba TATOLI nia jornada dezde nia ezisténsia to’o ohin loron, ho foku makaas iha “susar no terus, midar no moruk” ne’ebé jornalista dahuluk TATOLI nian konsege ultrapasa to’o momentu ida ne’e.

Ha’u hatene katak ne’e difísil, tanba para aléinde hakerek no kompila hanoin hirak ne’e sai livru iha tempu badak de’it, sira mós iha servisu primáriu ida ne’ebé sei nunka bele adia nu’udar jornalista no nu’udar editór iha TATOLI. Maske nune’e, ha’u iha konviksaun boot katak sira sei konsege. Ida ne’e tanba ha’u fiar ba sira-nia entuziazmu, sira-nia hanoin luan, sira-nia espíritu ekipa no liuliu tanba ha’u haree iha sinerjia entre “hirak ne’ebé halo istória no ida ne’ebé esperiente tebetebes iha hakerek livru”.

Na verdade, sira konsege, no ohin lokraik ida ne’e, ita sei asiste prosesu lansamentu ida, maske la perfeitu no ho nia limitasaun oin-oin, ha’u tenke orgullu ba ekipa ida ne’e, no liu-liu orgullu ba sira-nia determinasaun no espíritu responsabilidade ne’ebé tula ba sira-nia kabaas, sein hasees husi sira-nia responsabilidade própria iha TATOLI.

Ba autór na’in rua (2) iha Livru ida ne’e, maun Rafy no maun Cancio ho ekipa editoriál sira no maun Dasiparu iha kolesaun foto sira ne’ebé sai ona livru hodi ohin bele lansa, ha’u-nia agradese wa’in no apresiasaun rohan-laek ba ita-boot sira. Ita-boot sira hotu, hola parte iha istória ita-nian, istória ne’ebé sei hatutan husi tempu ba tempu, durante ezisténsia Ajénsia TATOLI,I.P

Señór no Señora, Eselénsia

Konkista ida ne’e, halo parte husi atinjimentu sira seluk ne’ebé ami konsege iha tinan 2019 nu’udar instituisaun públiku foun ida. É klaru, katak la’ós buat ne’ebé ami promete ami realiza hotu. Ba hirak ne’ebé ami la konsege ami kontinua rejista no sei inklui iha planu ba 2020 atu realiza. Maske nune’e, permite atu ha’u sita pontu balun husi buat ne’ebé ami konsege no ami la konsege hodi hatudu iha ekilíbriu ba pontu de situasaun iha tinan 2019.

Nu’udar ha’u temi beibeik iha fatin barak, katak bainhira ha’u integra ba TATOLI iha janeiru 2019, ha’u iha kolega jornalista na’in-hitu (7) ho tékniku destakadu na’in-tolu (3) husi SEKOMS. Ohin loron ha’u iha ona kolega sira hamutuk ema na’in-42, no entre númeru hirak ne’e, na’in-31 mak dedikadu ba servisu redasaun, lideradu husi Diretora Ezekutiva ida. Envolvimentu feto iha hola desizaun iha TATOLI ne’e indiskutivel. Parabéns ba ekipa redasaun iha TATOLI.

La’ós de’it rekursu umanu mak halo ha’u preokupa husi inísiu, ekipamentu no kondisaun servisu sira mós preokupante tebes. Ami uza fasilidade sira barak privadu, komputadór ne’ebé imprestadu husi SEKOMS no okupa kuartu oan ida iha Palácio do Governo nu’udar ami-nia news room.

Ohin, ho kontente mak ha’u tenke sita iha ne’e, katak ami-nia kondisaun servisu pelumenus favoravel ona (tamba muda ona husi Palácio mai Farol), ekipamentus servisu ba nesesidade emerjente bele responde ona to’o 25% husi ideál.

Hirak ne’e, ami konsege atinje tanba apoiu inkondisionál ne’ebé ami simu husi SEKOMS liuhusi alokasaun orsamentu própriu ba TATOLI ho valór $644.000 iha 2019 no asisténsia sira seluk ne’ebé ami sei labele sura hotu. Ba apoiu hirak ne’e, ami-nia agradese wa’in no ami sei kontinua harohan atu liuhusi kosok oan Jesus nia moris no tinan foun be mai ne’e, hakonu SEKOMS no nia emar sira grasa wa’in be sura la nahas.

Señór no Señora, Eselénsia

Ami sempre konsidera katak orsamentu ne’ebé alokadu ba TATOLI la’ós puramente despeza anuál ne’ebé mohu leet. Ami konxiente iha ami-nia an, no hanoin iha ami-nia mehi laran, katak montante alokadu ne’e INVESTIMENTU ida, no tamba nu’udar investimentu, importante tebes atu ami bele haree no rejista nia impaktu ka liafuan seluk, saida mak TATOLI konsege fó hikas fali ba Estadu.

Loos duni, katak la’ós buat hotu bele haree nia rezultadu iha tempu badak, no la’ós buat hotu bele sukat ho impaktu iha númeru, maibé importante atu ami sita númeru balun hodi justifika, será que investimentu ida ne’e iha duni rezultadu, no hatudu katak vale a pena, Estadu investe iha TATOLI.

Iha nivel makro, ami bele dehan katak TATOLI halo ona balansu iha publikasaun notísia no liuliu informasaun hirak ne’ebé ita-nia sidadaun sira hein atu asesu ho lalais no kredivel. Ne’e hatudu liuhusi númeru notísia ne’ebé progresivamente sa’e husi notísia 200 iha janeiru 2019 ba notísia 600 iha novembru 2019, no totál iha tinan 2019 ami konsege publika notísia hamutuk 5.319. Númeru ida ne’e sa’e kuaze 59% kompara ho totál notísia ne’ebé prodús iha 2018.

Hanesan ne’e mós ba vizitante ba portál TATOLI nian, ne’ebé sa’e husi tokon 6,236, 486. Iha janeiru 2019 ba tokon 13, 843, 284 iha novembru 2019. Númeru vizitante nian mós sa’e kuaze 47%, kompara ho tinan 2018.

Nune’e mós tuir mandatu ne’ebé estatutu haruka, atu publika ho karater multimedia no multi-língua, ami konsege ativa ona notísia iha lian portugés no inglés maske ho porsaun ne’ebé sei uitoan tebes, ho totál notísia 95 n iha portugés sura husi agostu mai dezembru no notísia 54 iha inglés sura husi outubru mai Dezembru.

Entretantu publikasaun vídeo iha youtube, dezde maiu 2019 to’o ohin loron, ami konsege publika ona vídeo hamutuk 36 ho totál ema ne’ebé subskreve hamutuk ema na’in-375, ho totál ema viewer ka haree ona publikasaun vídeo entre períodu ida ne’e hamutuk 21,680. Númeru ida ne’e karik la’ós ideál liu, maibé se kompara ho kondisaun ne’ebé ami enfrenta (la’ós atu halo auto defeza), maibé ami koko ona ho másimu posivel tuir kbiit ne’ebé ami iha. Ami kompromete atu kontinua hadi’a no prodús barak liután iha tinan oin.

Señór no Señora, Eselénsia

Tanba ita tama daudaun ona ba époka foun iha 2020, TATOLI mai ho nia tagline foun mós, katak “2020 TATOLI EVOLUI”. Ami kompromete atu evolui iha ami-nia publikasaun iha multi-língua, multimedia no multiplataforma. Kolega sira iha TATOLI, simu ona orientasaun klaru no hatene ho didi’ak tebes katak 2020 sei hasoru situasaun foun no trajetu ida husi prosesu evolusaun mak tenke rekolla reseita hamutuk 2,5% husi totál despeza ne’ebé alokadu. Se refere ba orsamentu ne’ebé prepara daudaun ba TATOLI iha 2020 ho totál $534,000 mak to’o Dezembru 2020, TATOLI tenke rekolla reseita hamutuk $13,350. Karik ki’ik no sei la fasil ho kondisaun ekonomia ita-nia rain nian, maibé ami kompromete atu esforsu an, no valór ida ne’e sei komprova iha dezembru tinan oin, bainhira ita hasoru malu fali iha fatin ida ne’e, se Deus Quizer.

Antes konklui diskursu ida ne’e, ha’u hakarak aproveita momentu ida ne’e atu hato’o agradesimentu ein espesiál dala ida tan ba sua. Eselénsia SEKOMS ne’ebé hatudu iha prátika apoiu inkondisionál ba TATOLI iha forma oin-oin, ne’ebé ami simu durante ne’e. Nune’e mós ba diresaun hotu iha SEKOMS, ba ita-boot sira-nia laran luak, ba ita-boot sira hotu nia pasiénsia hodi hasoru ami, iha períodu ami aprende, ami-nia agradesimentu kle’an tebes.

Ba kolega mídia na’in sira, liuliu ein espesiál ba STL, ne’ebé dezde agostu tinan ne’e, hahú ona ´Kutip” ka kópia TATOLI nia notísia sira hodi tau iha Jornál kuaze loroloron entre notísia 5–10, no importante liu mak sita nia fonte katak husi ANTIL/TATOLI, nune’e mós ba diresaun DNDI iha SEKOMS ne’ebé konsege inklui TATOLI nia not’isia iha boletín SEKOMS nian. Ba ita-boot sira hotu nia rekoñesimentu, konfiansa no respeitu mútua, ami hato’o obrigadu wa’in.

Ba hotu-hotu ne’ebé ha’u labele temi ida-idak, direta ka indiretamente kontribui ona ba susesu hirak ne’ebé ami temi iha leten, no sira ne’ebé sei tuir mai, ami-nia agradesimentu wa’in.

Ba Estadu nia interese no asegura sidadaun sira-nia direitu ba asesu informasaun loos no kredivel, ami sei firme no prontu nafatin iha ne’ebé de’it no bainhira de’it.

Dala ida tan, ami-nia obrigadu wa’in ba prezensa eselénsia sira-nian iha serimónia lansamentu ida ne’e.

Obrigadu barak e kontinuasaun Feliz Natal nian ba ita-boot sira hotu.

Dili, Farol, 27 Dezembru 2019

José da Costa
Diskursu Prezidente Konsellu Diretivu TATOLI,I.P