DILI,27 dezembru 2019 (TATOLI)-Ministériu Saúde (MS) hamutuk ho Komisaun F Parlamentu Nasionál (MS) ofisialmente entrega ona karreta ambulánsia multifunsaun 14 no ambulánsia rua ba servisu saúde munisípiu 12 inklui Rejiaun Autonóma Espesiál Oe-cusse-Ambeno), iha Palácio das Cinzas, ohin.

“Karreta multifunsaun 14 no ambulánsia rua entrega ba ita-nia saúde munisípál sira hodi nune’e entrega tutan ba iha sentru saúde komunitáriu,” dehan Vise-Ministru Dezenvolvimentu Estratéjiku Saúde, Bonifacio Maucoli dos Reis bainhira hatoo diskursu iha ámbitu serimónia ofisiál entrega karreta multifunsaun 14 no ambulánsia rua ba munisipiu 12 inklui RAEOA.

Governante ne’e mós agradese ba PN tanba iha 2019 aprova Orsamentu Jerál Estadu (OJE) ho montante rihun 934 no 877.600 USD ba kompra veikúlu multifunsaun 14 no ambulánsia rua no sei iha balansu 56.400 USD liuhusi orsamentu ne’ebé alokadu ba MS hodi hahú prosesu konkursu aprovizionáriu.

Vise-Ministru Dezenvolvimentu Estratéjiku Saúde, Bonifacio Maucoli dos Reis husu mós ba benefisáriu sira atu kuidadu karreta ambulánsia sira ne’e tanba hola ho povu nia osan.

“Lori Ministériu Saúde nia naran hakarak apela ba motorista sira katak kuidadu no tau-matan di’ak ba patrimóniu estadu nian, operasionaliza tuir nesesidade no motorista sira tenke lori ho responsabilidade, kumpre regulmentu ba manutensaun”.

Entretantu karreta ambulánsia multifunsaun 14 no ambulánsia rua ne’e ba Munisípiu Aileu sei distribui ba Sentru Saúde Lequidoe, Munisípiu Baucau sei distribui ba Sentru saúde Venilale, Munisípiu Bobonaru sei distribui ba Sentru saúde Bobonaru, Munisípiu Covalima sei distribui ba sentru saúde Munisípiu Covalima, Munisípiu Dili sei distribui ba sentru saúde Munisípiu Dili, Munisípiu Ermera sei distribui ba sentru saúde Hatulia no Atsabe.

Munisípiu Lautem sei distribui ba sentru saúde Iliomar, Munisípiu liquiça sei distribui ba sentru saúde liquiça vila, Munisípiu Manatuto sei distribui ba sentru saúde Soibada, Munisípiu Manufahi sei distribui ba sentru saúde Same, Munisípiu Viqueque sei distribui ba iha sentru saúde Viqueque Villa, RAEOA sei distribui ba sentru saúde Baoknana.

Partisipa iha serimónia entrega karreta multifunsaun no ambulánsia ne’e mak husi Komisaun F Parlamentu Nasionál trata asuntu saúde, diretór saúde munisípiu no diretór saúde nasionál inklui motorista sira husi Munisípiu 12 inklui RAEOA.

Notísia relevante:Ambulánsia 16 to´o Ona Dili Maibé Seidauk Entrega Ba MS

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here