Ministru Negósius Estranjeirus no Kooperasaun, Dionísio da Costa Babo, Lansamento Livru Tatoli Nia-Ain-Le'ut no LaLatak. Imajen/Tatoli Egas Cristovao

DILI, 27 dezembru 2019 (TATOLI)-Ministru Negosiu Estranjeiru no Kooperasaun (MNEK), Dionísio da Costa Babo Soares hateten katak orgullu tebes hanesan timoroan ida, hanesan ema ida ne’ebé gosta lee infomasaun katak Agência TATOLI sai tiha ona hanesan ajénsia referénsia.

“Atu sai ajénsia referénsia la’ós fasil, ne’e tanba saida, ne’e nia presiza komprimisiu, presiza responsabilidade no presiza mós respeitu ba normas transparénsia no mós liliu komprimisiu ema idaidak nia serbisu nia laran,” hateten Ministru Dionísio Babo liuhusi diskursu iha ámbitu lansamentu livru TATOLI nia Ain-le’ut no LALATAK iha edifísiu provizóriu Agência TATOLI, Farol, ohin.

Diplomata ne’e akresenta katak, ita iha media barak, liliu ohin loron iha média sosiál ne’ebé projeta sasan ba iha públiku la taka. Projeta sasan ba iha públiku, hakerek detallu hakerek saida de’it mak akontese.

“Ne’e aprosimasaun ida, aprosimasaun ne’e iha media komunikasaun sosiál liuliu atu fó informasaun ba ema ne’ebé mak barak ne’ebé mak sei mosu interpretasaun oioin, perigozu tebes ba iha projesaun informasaun liuliu ba estabilidade rai ida ne’e”.

“Tanba ne’e estadu hotu iha mundu ne’e, governu hotu iha mundu ne’e interrese katak, sira mós iha reprezentasaun ida iha informasaun, liuliu informasaun ne’ebé sai loloos transparente ne’ebé mak tuir regra,” katak Ministru Dionísio Babo.

Eis-Ministru Justisa iha Sestu Governu Konstitusionál ne’e hateten tan katak, Depois akonpaña iha tinan rua ikus ne’e bele dehan katak ita konsege ona iha ajénsia ida ne’ebé konsege sai ona hanesan ajénsia referénsia.

“Katak media hotu bele hakerek tuir sira-nia hanoin, maibé ema sei chek lai ho TATOLI, ida TATOLI ko’alia ne’e loos ka la’e, ida TATOLI ko’alia ne’e tuir saída mak hakerek ne’e ka lae”.

“Tanba ne’e ha’u enkoraja ita-boot sira atu kontinua mantein, sei bele  foti tan kualidade hakerek para depois bele iha duni kredibilidade, tanba ne’e la’ós fasil atu hetan konfiansa públika, ita presiza tempu, segundu ita presiza norma sira ne’ebé ita ko’alia tiha ona,” dehan diplomata ne’e.

Diplomata timoroan ne’e reforsa tan katak, hanesan estadu, hanesan governu hakarak dehan katak, fó atensaun maka’as tebes ba iha media iha ita-nia rain, ita tenke kuidadu mak ne’e, kria deskonfiansa iha ita-nia sosiedade ba ita-nia media.

“Tanba ita kria deskonfiansa ba ita-nia media, ema públiku normalmente iha nia opiniaun liuliu sira lee”.

Iha parte seluk, Ministru Dionísio da Costa Babo Soares demostra katak, gosta tebes akonpaña notísia sira ne’ebé ita-nia jornalista sira hakerek.

“Dala ruma halo ha’u-nia interpretasaun ho ha’u-nia avaliasaun rasik no terseiru ha’u hanoin importánsia hanesan nasaun hanesan ita-nia nasaun ne’ebé kiik, ita iha estratéjiku importante duni tenke iha Ajénsia Notisioza ida ne’ebé la’ós atu defende governu-nia interesse, maibé atu defende interrese komun ba ita-nia povu ni’an, hodi bele kria balansu liuliu iha informasaun ne’ebé habelar ba ita hotu”.

Fó Parabéns

Iha biban hanesan, Ministru Negosiu Estranjeiru no Kooperasaun, Dionísio Babo fó parabens ba Agência TATOLI, IP inkluzivamente eskritór livru TATOLI Nia Ain-Le’ut no LALATAK.

“Fó parabéns ba eskritór sira no ba inisiativa di’ak hosi TATOLI, atu halo kompilasaun pensamentu husi kolega jornalista sira ne’ebé uluk komesa tiha ona, no agora halo hamutuk tau hamutuk iha kompilasaun.

“Segundu mai ho artigu haat ka lima ne’ebé iha, jornalista hakerek, fó hanoin kona-ba sira-nia esperiénsia primeiru tempu oinsá mak atu bele komesa halo sira-nia serbisu funsaun liliu ba instituisaun ida ne’e”.

Governante ne’e dehan, Estadu tau importánsia boot tebes ba iha diseminasaun informasaun ba ita-nia sosiedade. Hanesan país independente ida, órgaun kontrolu sosiál ida importante liuliu, ne’ebé atu bele ajuda estabilidade, ajuda balansu ka ekilibriu iha informasaun ne’ebé espalla iha sosiedade maka media.

“Hanesan país demokratiku barak iha mundu ne’e, ita labele iha monipolizasaun ba media, sempre iha liberdade atu espresaun, liberdade atu hato’o informasaun, dezde imi-nia respeita valor, respeita lei, iha regras ne’ebé halo,” dehan Eis-Ministru Justisa iha Sestu Governu Konstitusionál ne’e.

Diplomata ne’e haklaken, iha Timor-Leste, desde kedas iha independente, ita sai país independente to’o iha tinan rua ka tolu liu ba ita seida’uk konsege iha balansu informasaun, ida ne’ebé estadu bele koloka atu bele fó informasaun referénsia ba ita-nia sosiedade, saída mak akontese durante tinan hirak nia laran, kualker media ou Ajénsia informasaun bazeia ba sira-nia koñesimentu no órgaun ne’ebé atu ekilibra informasaun ne’e.

“Liliu atu projeta pozisaun públika ninian, pozisaun estadu nian kualker seja governu ida ba iha komunidade no ba mós iha mundu, tanba ne’e mosu ideia ida ne’ebé mak atu harii ajénsia Notisioza,” heteten Dionisio Babo.

Ministru Dionisio haktuir, nia parte akompaña kedas ho membru governu sira iha tempu hirak liubá, iha prosesu diskusaun kona-ba oinsá atu estabelese ajénsia informasaun ofisiál estadu Timor-Leste nian ida. “Ne’ebé, iha previlejiu atu akonpaña, haree katak ideia ne’e kapas tebes,” nia konklui.

Notísia relevante:2019, Vizitante Portál TATOLI Hamutuk Tokon 13,843,284

Jornalista : Nelia Fernandes

Editór      : Rafy Belo

 

HAKEREK NO HATÁN

Please enter your comment!
Please enter your name here