Lansamentu livru "Tatoli nia ain-le'ut" no "Lalatak". Imajen/Antonio Goncalves

DILI, 27 dezembru 2019 (TATOLI)—Ema-nia matan haree/limanfuan book-aan/matan piska-piska/iha lente kamera nia kotuk be monok no malirin/no, roman mós nakfera/naklekar iha filme ida be iha kamera nia oin/entaun, momentu ida mós liu daudaun//.

Maibé, ohin, grava-metin/iha memória kímiku nia laran/iha lembransa husi imajen [lalatak] oan ida/ne’ebé prontu atu hamaus tan/iha realidade ida ne’ebé mihis hanesan surat-tahan/kona-ba akontese tiha ona buat ruma/kona-ba iha ema ida mós//.

No, hahú ohin no ba nafatin/ema-nia matan atus ba rihun/mak sei bele haree memória no lembransa ne’e/ho matan-“fuan” nian/ho matan ida ba matan hotu-hotu/matan hotu-hotu sei haree matan ida-nia matan.

            Iha livru “LALATAK” ne’ebé Ajénsia TATOLI,IP produz ne’e nia laran, lalatak lubuk ida mak forma-aan sai hanesan evidénsia ida ba fotografu ida-nia matenek no arte hasai fotografia (retratu) sai memória no lembransa ba momentu importante sira ne’ebé liu ho tempu ida-nia hakarak. Lalatak sira ne’e hakerek ho roman ida-nia kbiit ne’ebé sei hakbiit lalatak sira ne’e moris nafatin ba nafatin.

            Fotografia nu’udar arte ka prosesu kaer-toman imajen no roman (naroman) iha filme. Liafuan fotografia ne’e mai husi dalen Grésia, PHOTOS signifika “roman” no GRAPHOS signifika “hakerek”. Entre “roman” bele “hakerek” no “hakerek” ho “roman”. Tanba, arte fotografia foti husi dalan rua mak liuhusi “prosesu ida” no liuhusi “momentu ida” ne’ebé kaptura husi “roman” ida-nia kbiit.

            Iha “prosesu ida”, ho fotografu ida-nia arte hasai fotografia ho “kakutak”-“matan”-no “fuan”, lente kamera ida-nia “roman” bele “hakerek” relasaun entre ema ho ema no bele “hakerek” ho “roman” kona-ba relasaun entre ema ho natureza nomós entre ema ho ninia destinu rasik. Ho nune’e, matan “fuan” nian mós sensivel, atu fó-ukun ba kamera nia matan hodi kaptura momentu ne’ebé folin liu hodi hatudu ba ema seluk.

            Momentu folin liu ne’ebé fotografu Ajénsia TATOLI,IP kaptura iha akontesimentu sira mak husi kategoria sosiál polítika, labarik no juventude, turizmu, arte no kuktura, defeza no seguransa, ne’ebé kompila hamutuk iha livru-fotografia dahuluk ho titulu “LALATAK” ne’e, sai sasin no hasasin TATOLI,IP nia lalatak sira durante tinan tolu (3) TATOLI,IP eziste iha Timor-Leste.

            Fotografia ida ne’ebé di’ak mak fotografia ida ne’ebé informativu ne’ebé bazeia ba kontestu, kontiudu, no kompozisaun. Kontestu signifika iha buat ruma ne’ebé mak hakarak atu vizualiza ho momoos no kontiudu signifika saida mak atu aprezenta atu hakonu kontestu imajen refere.

Fotografia nu’udar arte tanba la’os de’it eterniza realidade iha imajen ne’ebé mai husi sá mak mosu nune’e de’it maibé liu ida ne’e, fotografia fó valór poetiku dalen-imajen ida-nian ne’ebé iha semiolojia nunka “innocent” tanba imajen refere homan husi sistema sinál ne’ebé bele kaptura akontesimentu ida iha momentu ida ne’ebé folin liu.

Fotografu profesionál, Antonio “Dasiparu” Gonçalves, ho ninia sentimentu, imajinasaun no matan be kro’at, nia konsege kaptura no hakerek istória sosiál politika ne’ebé akontese iha Timor-Leste liuhusi ninia kamera nia “roman” be rezulta fotografia wa’in be hedi-metin iha livru “LALATAK” ne’e nia laran.

Atu halo “roman” ne’e sai nabilan liután, fotografia hamutuk 150 ne’ebé prega hela iha livru ho pájina 100 ida ne’e, maihusi fotografu TATOLI,IP seluk, Jogerjo Guterres ne’ebé kontribui hodi kaptura bibi-rusa iha Illa Jaco ne’ebé hamrook ba bee-moos hodi hemu tasi-been nia lalatak no lalatak “desportu” nian ne’ebé kaptura husi fotografu Hortencio Sanches hodi hariku livru “Lalatak” ne’e sai furak no kmanek liután.

Lalatak sira iha livru “LALATAK” ne’e nia laran, fó-hatudu lalatak ba ema hotu atu haree TIMOR-LESTE nia lalatak liuhusi TATOLI,IP nia lalatak sira ne’ebé “moris”, hodi fó klamar ba “LALATAK” sira atu “moris” no “fó moris” ba “heransa” no “memória pasada” ida moris ba nafatin.

Notisia relevante:Hakerek-Na’in Sira Hakerek Tanba Hakerek

Jornalista : Cancio Ximenes

Editór     : Rafy Belo

 

HAKEREK NO HATÁN

Please enter your comment!
Please enter your name here