Logotipu ICS

DILI, 27 dezembru 2019 (TATOLI) – Magnífiku Reitór ICS (Instituto Ciências da Saúde), Miguel Quintão hateten ba graduadu ICS sira katak almamater nu’udar identidade hodi reprezenta instituisaun ida tanba ne’e buka haka’as aan nafatin atu sai ema ne’ebé profisionál iha komunidade nia leet, tanba ambiente ne’ebé foun, dezafiu mós sei boot liután.

“Susesu ne’ebé ohin imi hatudu liuhusi graduasaun ida ne’e, tenke hatudu liután iha futuru uainhira ICS re-integra fali ita bo’ot sira ba moris ho komunidade. Mantein imi-nia susesu no disiplina hodi asegura identidade Almamater instituisaun akadémiku ICS nian,” dehan Reitór Miguel ba estudante finalista na’in 194 iha salaun Canossa has laran, ohin.

Akadémiku ne’e dehan, rekoñesimentu ida ne’e atu reforsa liután graduadu sira-nia karteira profisionál iha área saúde no hanesan bukae ida husi esforsu tomak ne’ebé durante hala’o iha tinan haat nia laran. Progresu sira ne’e, kaer metin intelejénsia espirituál, intelektuál, sosiál no intelektuál-emosaun.

“Ha’u fiar katak ho ambiente foun ne’ebé imi sei integra aan ba ha’u husu atu aproveita hodi kria oportunidade idadiak no dignu atu komunidade bele simu imi-nia prezensa, atu nune’e labele hamonu dignidade instituisaun nian”.

Susesu ne’ebé graduadu sira atinje, tuir Reitór Miguel Quintão katak ne’e esforsu família nian mós liuliu inan-aman sira.

“Dezafiu no obstakulu durante tinan haat nia laran fó hanoin ba ita-bo’ot sira atu hakat ba oin ho atensaun no responsalblidade hodi garante grau akadémiku ne’ebé imi simu ona. Buka atu halo inovasaun iha imi-nia moris, sosiadade no mós ba nasaun hodi servisu ho responsabilidade atu fó nafatin atendementu adekuadu ba ema hotu,” nia fó hanoin.

Entertanto, estudante finalista na’in 194 ne’e kompostu husi Fakuldade Siénsia Saúde ho departementu haat mak hanesan Enfermazen, Farmasia, Parteira no Nutrisaun Dietika.

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here