Logotipu UNPAZ

DILI, 27 dezembru 2019 (TATOLI)-Pro-Reitór Asuntu Akadémiku, Joaninho Xavier Hei informa katak estudante finalista Universidade da Paz na’in neen la tuir graduasaun tanba serbisu iha rai li’ur.

“Husi totál 1.593, menus ne’en. Razaun tanba kuaze sira na’in rua partus; hein de’it loron atu partus, entaun sira labele mai rejistu no mós hakat ba graduasaun, prosesu sira seidauk prienxe, ne’e mak sira labele hakat no restu ha’at ne’e ba serbisu iha Austrália (seasional worker),” hateten Pro-Reitór Joaninho Xavier Hei ba Ajénsia TATOLI, iha nia kna’ar fatin UNPAZ, Sexta ne’e.

Maske nune’e, tuir nia, tinan oin sira na’in neen bele tuir graduasaun importante tuir prosesu ne’ebé mak estabelesimentu ensinu iha. “Baibain hanesan ne’e, ne’ebé atu partu tinan oin sei mai, balun akontese bebeik kada tinan sira balun ba serbisu Korea, balun ba Inglatera liutiha tinan ida, tinan rua, sira mai sira hasoru, ita haruka sira tuir prosesu ne’ebé iha, sira prienxe tiha rekezitu foin bele tuir prosesu graduasaun”.

Entretantu, graduasaun UNPAZ iha dezembru ne’e sei fahe ba loron rua, ida iha loron 28 no seluk iha 30. Iha loron 28 sei gradua husi Fakuldade tolu ho departamentu lima hanesan Fakuldade Saúde Públika ho departamentu hanesan Saúde Públika, Fakuldade Direitu ho departamentu hanesan Siénsia Direitu no Fakuldade Siénsia Sosiál no Umaniora ho departamentu hanesan Relasaun Internasionál, Polítika Desenvolvimentu no departamentu Estudo da Paz.

Iha loron 30, fakuldade tolu no departamentu ualu, hanesan Tékniku Agrikultura, departamentu Prosesamentu Alimentár no departamentu Konservasaun Naturais. Fakuldade Ekonomia, departamentu Jestaun, departamentu Kontabilidade no departamentu Bankária no Fakuldade Enjeñaria ho departamentu hanesan Arkitektura, departamentu Indústria no departamentu Konstrusaun sívil.

Totál estudante finalista ba graduasaun ohin hamutuk 771 no 30 nian hamutuk 816. Nune’e total estudante finalista UNPAZ ne’ebé mak tuir graduasaun ba loron rua ne’e hamutuk 1.587.

Notísia relevante:Graduasaun UNPAZ Sei “Ala Eropa”

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here