Koordenadór AIFAESA, Abílio Oliveira Sereno, hasai foto hamutuk ho partisipante sira iha semináriu kona-ba Divulgasaun Informasaun sobre lei sira ne'ebé regula atividade ekonómika iha Timor-Leste ne'ebé hala'o iha salaun Delta Nova, sesta (27/12/2019). Imajen TATOLI/Antónia Gusmão.

DILI, 27 dezembru 2019 (TATOLI) – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) realiza semináriu kona-ba divulgasaun informasaun sobre lei sira ne’ebé regula atividade ekonómika iha Timor-Leste.

Koordenadór AIFAESA, Abílio Oliveira Sereno, hateten liuhusi semináriu ida ne’e bele fó oportunidade ba operadór ekonómiku hothotu bele koñese didi’ak kompeténsia instituisaun hothotu ne’ebé iha ligasaun ho atividade kontrolu alimentár.


AIFAESA realiza semináriu kona-ba, divulgasaun informasaun sobre lei sira ne’ebé regula atividade ekonómika. Imajen TATOLI/Antónia Gusmão.

Aléinde ne’e, hato’o informasaun hosi serbisu ida-idak nian durante ne’e. “Hosi semináriu ne’e buka meiu para transmite ba operadór ekonómiku no Konsumidór, no populasaun jerál Kona-ba ami-nia serbisu, ami-nia kompeténsia no mós lejizlasaun sira ne’ebé mak ami haree importante tebetebes ne’ebé kontrataria negosiante, operadór ekonómiku, própriu konsumidór sira”, Koordenadór AIFAESA afirma ne’e iha semináriu ne’ebé realiza iha salaun Delta Nova, ohin.

Abílio Oliveira Sereno hatutan liuhusi eventu ne’e mós atu informa ba operadór ekonómiku sira atu labele monu ba susar.

Tuir Abílio, susar ne’ebé maka operadór ekonómiku sira hasoru maka multa. “Situasaun sira ne’ebé maka ami aposta liu maka asaun prevensaun liuhosi semináriu, divulgasaun oioin ba operadór ekonómiku sira bainhira monu ba susar ou infrasaun ruma, tanba ne’e maka durante ne’e, dezde estabelese AIFAESA inspesiona iha mudansa, kompara iha 2017, 2018 no 2019 estabelesimentu ne’ebé AIFAESA inspesiona nia volume sa’e”, Abílio katak.

Iha 2017, estabelesimentu ne’ebé AIFAESA inspesiona hamutuk 1.200, iha 2018 hamutuk 700 no tinan ne’e 3.300.

Partisipa iha semináriu ne’e mai hosi operadór ekonómiku sira, Tane Konsumidór, Institutu Kualidade, no seluk tan.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here