Eis Prezidente Repúblika, José Ramos Horta fahe kabazes Natál nian ba labarik sira, bainhira selebra tinan moris nian ba-70 iha Matiaut. Imajen TATOLI/Cipriano Colo

DILI, 26 dezembru 2019 (TATOLI) – Eis Prezidente Repúblika, José Manuel Ramos Horta, kompleta ona tinan moris nian ba dala-70 iha kinta ne’e.

Iha tinan-70, Horta hili haksolok hamutuk ho labarik sira husi suku Metiaut, postu administrativu Cristo Rei, munisípiu Dili, ne’ebé hala’o iha Restaurante Mozefala, Bekaril, Metiaut.

Biban ne’e, partisipa mós hosi Primeiru Ministru (PM), Taur Matan Ruak ho ninia espoza.

Selebrasaun ne’e, realiza hosi inisiativa Horta, hamutuk ho organizasaun husi Fundasaun Centro Quesadhip Ruak Timor-Leste liuhosi ninia fundadora, espoza PM Taur, Isabel Ferreira, hodi fahe kabazes Natál ba ki’ikoan sira.

José Ramos-Horta, moris iha loron 26 dezembru 1949 iha Dili, ninia inan ema Timór no ninia aman ema Portugés.

Nia iha maun alin hamutuk na’in-11 no na’in-tolu husi maun alin hirak ne’e mate iha tempu okupasaun Indonézia.

Horta hetan edukasaun husi misaun Katólika Roma nian no hahú ninia kareira iha área jornalizmu iha tinan 1969 iha Timor-Leste.

Hafoin liuhosi tinan-400 okupasaun Portugés nian, iha loron 28 novembru 1975 FRETILIN proklama independénsia, hafoin iha loron restaurasaun independénsia 20 maiu 2000, harii nasaun Repúblika Demokrátika Timor-Leste (RDTL) no hetan rekoñesimentu husi nasaun seluk no

Iha loron 4 dezembru 1975, José Ramos Horta husik hela Timor-Leste hodi ba Nova Iorke.

Bainhira to’o iha Nova Iorke, nia komunika ho Konsellu Seguransa Organizasaun Nasaun Unida (ONU) nian, ne’ebé tuir mai adota rezolusaun maioria ida hodi husu Indonézia dada sai ninia forsa husi Timor-Leste.

Nune’e, husi tinan 1975 to’o 1999, Horta sai nu’udar vise permanente ba FRETILIN nian iha ONU no nia sai nu’udar diplomata ne’ebé ho idade ki’ik liu iha istória ONU nian.

Nia hatutan ninia viajem hodi ko’alia ho Governu husi rai oin-oin no kria liña apoiante sira ba kauza ne’ebé akontese ba ninia povu.

Iha tinan 1990, nia hela iha Sydney, Austrália no harii programa treinamentu ba diplomásia nian iha Universidade New South Wales.

Iha Dezembru 1996, José Ramos Horta no Bispu Don Carlos Ximenes Belo, manan prémiu Nobel da Pás nian ba sira nia servisu hodi hetan solusaun ida ne’ebé justu no dame ba konflitu iha Timor-Leste.

Ba dahuluk, iha dezembru 1999, Horta fila hikas mai ninia rain ne’ebé nia husik hela durante besik tinan 25 nia laran.

Momentu ne’ebá, Timór-oan rihun ba rihun mak nakonu iha Aeroporto Comoro no área tasi ibun Dili nian, hodi simu nia ho haksolok.

Iha Governu dahuluk, momentu ne’ebá Ramos Horta hetan fiar hodi sai nu’udar Ministru Negósiu Estranjeiru no kooperasaun iha tinan 2002.

Horta mós sai hanesan Prezidente Repúblika Demokrátika Timor-Leste iha 20 maiu 2007 to’o 20 maiu 2012.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here