Eis Prezidente Repúblika, José Manuel Ramos Horta, hako'ak malu ho Primeiru-Ministru, Taur Matan Ruak, iha selebrasaun Natál hamutuk ho labarik sira iha Zella Restaurante, Metiaut. Imajen TATOLI/Cipriano Colo

DILI, 26 dezembru 2019 (TATOLI)–Eis Prezidente Repúblika, José Manuel Ramos Horta hakfodak ba deputadu sira ne’ebé lakohi atu halo redusaun ba orsamentu privativu Parlamentu Nasionál (PN).

“Ha’u hakfodak tanba Parlamentu Nasionál konsidera Orsamentu Jerál Estadu (OJE) tinan 2020 boot liu no husu Governu atu halo redusaun ba ministériu hotu, maibé Parlamentu rasik lakohi redús ninia osan privativu. Ida-ne’e populasaun bele halo reasaun, hirus, tanba uluk estudante sira ezije ba deputadu sira atu labele gasta osan boot hodi sosa Prado tanba ita-nia populasaun iha Maubisse ne’ebá susar tebes atu mai fa’an sira-nia produtu iha kapitál, tanba karreta laiha, dalan ladi’ak no seluk tan”, Horta hato’o lia hirak-ne’e, hafoin selebra tinan moris nian ba dala 70 hamutuk ho labarik sira iha Zella Restaurante, Metiaut, Dili, ohin.

Ne’e duni, Horta fó konsellu ba deputadu sira katak di’akliu hatudu ezemplu morál, ezemplu polítiku ba populasaun hodi redús tiha orsamentu privativu Parlamentu Nasionál.

“Ha’u husu atu ko’a pursentu 70 husi orsamentu viajen nian”, nia sujere.

Horta hatutan, Governu redús duni ninia orsamentu ba viajen ministru sira-nian, diretór sira-nian, funsionáriu sira-nian, tanba Primeiru-Ministru ema ida-ne’ebé rigorozu tebes, ema gerilleiru ida-ne’ebé foti desizaun la halimar, fó órden ba membru Governu atu iha tinan 2020 konsentra de’it iha rai-laran.

“Primeiru-Ministru ema ida-ne’ebé gerilleiru, iha autoridade, fó duni órden rigorozu ba membru Governu hodi redús duni orsamentu tanba hanoin povu ida-ne’e”, Horta hateten.

Entretantu, Orsamentu Privativu Parlamentu Nasionál mantein ho millaun $16.486.896.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here