Diretór Ezekutivu Telkomcel, Yogi Rizkian Bahar (klaran), Vise-Prezidente, Heru Yulianto (liman-Loos), no Vise-Prezidente, Sudin (liman-karuk) hala'o hela konferénsia ba imprensa iha media center Telkomsel, Santos Living, Ai-mutin, segunda (23/12/2019). Imajen TATOLI/Antónia Gusmão.

DILI, 24 dezembru 2019 (TATOLI) – Operadór Telkomcel aléinde investe iha área telekomunikasaun nian, empreza internasionál ne’e mós kria programa asaun karidade ba komunidade Timor-Leste no ajuda kontrusaun kapela ida iha Ulmera.

Diretór Ezekutivu Telkomcel, Yogi Rizkian Bahar, hateten Telkomcel aléinde oferese diskontu ba ninia kliente sira, kontinua hala’o programa Responsabilidade Sosiál Korporativa (CRS, sigla inglé) ne’ebé hanesan parte hosi papél Telkomcel nian hodi tulun komunidade no suporta dezenvolvimentu iha Timor-Leste.

“Tama loron boot Natál 2019, no tinan foun 2020, Telkomcel hala’o atividade sira hanesan asaun karidade ba komunidade hanesan parte hosi asaun Natál no tinan foun, entrega hahán no materiál ba família hirak ne’ebé presiza”, hateten Diretór Ezekutivu Telkomcel iha media center Telkomcel, Santos Living, Ai-mutin, segunda ne’e.

Yogy Rizkian Bahar afirma fatin hirak ne’ebé Telkomcel deside hodi hala’o asaun karidade ne’e maka hanesan iha Munisípiu Liquiçá, Manatuto, Covalima no mós ba orfanatu iha Postu Administrativu Maliana, Munisípiu Bobonaro.

Nune’e mós doasaun no suporta ba konstrusaun kapela Nossa Senhora da Boa Virgem iha aldeia Tarlau, suku Ulmera, Postu Administrativu Bazartete, Munisípiu Liquiçá. Doasaun ne’e hala’o tiha ona iha novembru 2019.

“Ami mós fó prenda ba populasaun ne’ebé serbisu iha edifísiu Telkomcel nian, komunidade hirak ne’e durante ne’e tulun ami iha atividade operasionál iha eskritóriu Telkomcel nian, no apoia mós sembako ba cleaners. Ami mós fahe prenda Natál hanesan pasta eskola ba oan sira hosi funsionáriu Telkomcel nian atu nune’e bele motiva liután sira atu kontinua estuda, basá sira hanesan jerasaun foun Timor-Leste nian”, Yogi dehan.

Biban ne’e, Yogi hato’o boas festas Natáll 2019 no feliz tinan foun 2020 ba povu Timor-Leste, espera iha tinan 2020 Timor-Leste dezenvolve di’ak liután.

Notísia relevante : Telkomcel Espera ho Ezisténsia Ceslink sei Fó Vantajen ba TL

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here