Prezidente Repúblika, Francisco Guterres Lú Olo hamutuk ho família iha Palásiu Nobre, Lahane. Imajen/Mídia PR

DILI, 24 dezembru 2019 (TATOLI) – Prezidente Repúblika (PR), Francisco Guterres Lú Olo, hamutuk ho Família, dezeja Ksolok Natál no Prósperu Tinan Foun ba Povu Timor-Leste.
Tuir nota ne’ebé Agência TATOLI asesu hosi Palásiu Prezidensiál, konsidera Natál nu’udar festa Família nian.

Nune’e mós, iha família laran mak fatin dahuluk hodi transmite valór husi inan no aman ba oan sira, husi avó sira ba bei-oan sira, husi bin no maun sira ba alin sira.

“Ha’u ho ha’u nia família tomak deseja ba imi ida-idak ho imi-nia família Santu Natál no Prósperu Tinan Foun nakonu ho pás, domin no ksolok”, haktuir mensajen PR Lú Olo iha tersa ne’e.

Biban ne’e, Xefe Estadu agradese mós ba apoiu ne’ebé povu tomak fó ba Prezidente Repúblika durante tinan 2019, nu’udar aman ba nasaun hamutuk ho ninia família.

“Konta nafatin ho povu tomak nia apoiu, povu nia dedikasaun no povu nia amizade iha tinan foun 2020. Ha’u-nia hako’ak boot ba imi hotu”, subliña mensajen PR.

Jornalista: Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here