Primeiru-Ministru, Taur Matan Ruak ho família. Imajen/Mídia GPM

DILI, 24 dezembru 2019 (TATOLI) – Primeiru-Ministru (PM), Taur Matan Ruak, hato’o Natál Kmanek 2019 no Tinan Foun 2020 nakonu ho domin no pás ba Povu Timor-Leste.

“Uluk liu, lori VIII Governu Konstitusionál nia naran, ha’u nia naran rasik no ha’u nia família nia naran, hato’o ba Povu Timor-Leste tomak, iha rai laran no mós iha rai li’ur, Natál Kmanek no Tinan Foun, nakonu ho domin no pás. Ha’u mos hakarak iha loron Natál ida ne’e, hato’o ha’u nia rekoñesimentu ba sira hotu ne’ebé iha kalan ida ne’e duni, kumpre sira nia obrigasaun hodi kontinua servisu nafatin, liuliu iha ospitál, PNTL no F-FDTL”, mensajen PM Taur liuhosi nota komunikadu ne’ebé fó sai husi Palásiu Governu, tersa ne’e.

Nu’udar Xefe Governu, nia hakarak aproveita oportunidade ida ne’e atu tranzmite ba hotu-hotu, liafuan enkorajamentu no esperansa ho hanoin ida katak, loron aban sei di’ak liu loron ohin.

PM Taur promete, sei halo esforsu tomak atu tinan hirak mai ne’e, bele serbi di’ak liután sidadaun sira, liuhosi programa sira ne’ebé trasa ona.

Taur Matan Ruak mós valoriza tebes buat di’ak barak ne’ebé parte hotu kontribui hamutuk, hodi konkista tiha ona ba rai ida ne’e, liuliu iha prosesu konstrusaun Estadu nian.

Maibé, nia mós rekoñese katak, iha buat barak mak tenki hadi’a no bele kontinua halo atu halakon ki’ak no mukit no transforma Timor-Leste nu’udar país ida ne’ebé justu, modernu, dezenvolvidu no prósperu liután.

“Boas festa Natál no Tinan Foun ba Povu doben Timor-Leste”, Xefe Governu hato’o mensajen.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here