Prezépiu Natal/Imajen foti husi Google

DILI, 24 dezembru 2019 (TATOLI)—Tinan-tinan, família boot Sarani Kristaun Katóliku sira iha mundu rai klaran, inklui Timor-Leste festeja loron boot Natal hodi hanoin hikas Jesus Nia moris iha Belem.

Maioria husi sarani sira espresa sira nia ksolok Natal ho maneira oi-oin. Maibé, barak iha tempu mundu dijitál ne’e haruka mensajen ba malu liuhusi rede sosiál no sms (short massage service) hodi dehan, Ksolok Natal, Bom Natal, Merry Christmass, Boas Festa do Santo Natal no seluk-seluk tan.

Maneira espresaun sira ne’e hotu, nia fundamentu mak espresaun fiar nian. Tanba Natal hanoin hikas Jesus Kristu Nia moris, ne’ebé fó korajen atu sarani sira renova-aan no fó aten-brani ba sarani sai militante atu sai forte iha fiar nian.

Liuhusi Liturjia misa solenidade Natal kalan, 24 dezembru 2019, iha Sentru Pastoral Luro-Mata, Comoro, Dili, Padre Selebrante Ilídio Correia, SDB, esplika, Feliz Natal ne’e nia sentidu katak, sarani ida fó korajen ba sarani malu atu haforte fiar iha Igreja no mós fiar iha sosiedade.

Ba sarani atus resin husi Bairru Luru-Mata, ne’ebé hola parte iha selebrasaun misa solene Natal kalan ne’e, Padre Ilídio Correia, SDB, haklaken, Natal mak festa aniversáriu ne’ebé mais selebradu, tanba la iha ema ida mak nia loron moris selebra liu fali Jesus nia loron moris, tanba Natal ne’e la’ós ema Kristaun de’it mak selebra, maibé sarani husi relijiaun no fiar seluk mós selebra hotu, mezmu maneira selebra ne’e la hanesan, tanba iha balun selebra Natal tanba hakarak buka lukru intermus atividade negósiu.

“Natal la’ós tenke han katupa, hemu tua, hatais roupa foun no elegante, maibé Natal ne’e Jesus Kristu,” hateten Padre Ilídio iha nia omilia.

Padre husi Kongregasaun Salezianu ne’e aprofunda katak Natal iha nia pensamentu rua; ida, Natal la’ós atu manan lukru, maibé festa universal Kristu nian. Katak Natal la’ós atu rekorda de’it, maibé prezente boot mai sarani sira nia moris loroloron, tanba selebra Maromak ne’ebé hola parte iha ida-idak nia moris ho baibain dehan Immanuel katak Maromak ho Ita.

Pensamentu Natal seluk (rua) mak  fokus ba prezépiu. Padre Ilídio Correia, SDB, haktuir Evanjellu hateten, Anju sira dehan ba bibi-atan sira katak, “sinál imi atu hetan mak imi sei hetan kosok-oan   toba hela iha balada nia han fatin”.

Liuhusi Amu Papa Francisco nia karta pastoral, foin daudaun ne’e,  fó korajen ba sarani hotu atu halo prezépiu tanba tuir Amu Papa katak, prezépiu mak evanjellu doméstika nian.

“Ita iha Timor-Leste, iha tinan balun liu ba, Governu bandu harii prezépiu iha bairru-bairru tanba ema balun viola (halo krime iha prezépiu laran, ne’e di’ak. Maibé ha’u ta’uk iha asesór balu mak fó asesoria la bele halo tanba iha sira nia rai mós la halo hanesan ne’e no balun la iha ona. Ha’u ta’uk ho intensaun seluk,” afirma Padre Ilídio Correia, SBD.

Nia aprofunda, prezépiu atu fó hanoin ba sarani sira hadomi malu, respeita ida-idak nia moris to’o respeita bebé ne’ebé sei iha hela knotak.

Padre Ilídio hateten, populasaun Timor millaun ida de’it, maibé la hadomi malu no la hadomi nia-aan rasik no oho malu beibeik to’o tempu ruma sei mohu no Xinés sira mós kontinua mai bar-barak.

“Natal mós fó sentidu atu respeita moris. Katak, respeita ita ida-idak nia moris no respeita ema seluk nia moris,” Padre Ilídio afirma tan.

Jornalista : Francisco Simões 

Editór       : Xisto Freitas 

HAKEREK NO HATÁN

Please enter your comment!
Please enter your name here