Arsebispu Metropolitana Arkidioseze Dili, Mgr. Virgílio do Carmo da Silva, SDB. Imajen/Egas Cristovão

Uluk knana’in, atan ha’u hakarak hato’o ha’u nia ksolok Natál nian ba sarani hotu-hotu, kiik eh boot, katuas eh ferik, sira ne’ebé iha sidade, sira ne’ebé foho, ba hirak ne’ebé moras iha ospitál, iha uma, hirak ne’ebé iha kadeia, sira ne’ebé ema la tau matan no liu-liu hirak ne’ebé dook hosi família.

Ita selebra daudaun Natál Na’i Nian. Ema hotu selebra Natál. Natál la’ós festa baibain ida, basá Festa ida ne’e ita selebra loron Jesus nia moris. Ita hanoin fali mistériu boot ida Maromak ne’ebé tanba domin halo-an sai ema.

Ne’e duni, wainhira ko’alia kona-ba Natál dala barak liga ho família, fraternidade, alegria, pás no seluk-seluk tan. Valór hirak ne’e hotu, hetan de’it iha Naroman Kristu Nian.

Ne’e duni, maluk doben sira, mai ita sai ba hasoru Natál, mai ita ba selebra Natál Na’i Nian la bele husik ita nia-an moris hanesan buat ida la kona, la manas, la malirin, tanba Natál tenke fanun duni ita.

Atu mai hasoru ita-nia Maromak liuhosi dalan oi-oin, ema oi-oin no tempu ne’ebé naruk mai termina ho Jesus nia moris. Jesus moris atu lori naroman mai ita, atu lori salvasaun mai ita, atu lori mós vida ne’ebé verdadeira, nune’e mak ita sai Maromak Nia oan. Selebra Natál katak, selebra Maromak ne’ebé tanba domin, mai hasoru ita ema no salva ita ema.

Selebra Natál katak, husik Natál tama iha ha’u nia vida no iha ha’u nia mundu. Ita la to’o selebra Natál de’it ho músika, iluminasaun no ho memoria furak sira de’it hodi hanoin kona ba Jesus ne’ebé moris tinan 2019. Lae! Ita tenke konstrui Natál. Jesus tenke moris iha ha’u nia fuan, nune’e bele hatudu iha ha’u, iha ha’u moris, iha ha’u nia ko’alia, iha ha’u nia liman no ain, iha ho ha’u nia vontade no kompromissu atu transforma mundu no rai doben ida ne’e ho valor ema no sarani nian iha família laran, iha komunidade nia leet, iha instituisaun Governu eh Estadu nian, iha polítika, iha negósiu, atu pás no solidariedade, justisa no lia-lós, mak sai ai-rin ne’ebé tane moris santu sarani ida nian.

Ha’u harohan atu “FITUN BOOT NATÁL NIAN” SEI SAI DUNI NAROMAN BOOT IDA BELE LENO TIMOR-OAN HOTU ATU HATENE HILI NO LA’O IHA DALAN NAROMAN, DALAN LIA-LÓS NO JUSTISA, DALAN UNIDADE, ESPERANSA, MORIS NIAN LA’ÓS TAN ONA DALAN NAKUKUN NIAN!

Ho fiar no esperansa ida ne’e mak atan ha’u dezeja RAHUN DI’AK NATÁL nian, ba Povu no sarani Timór tomak ho TINAN FOUN IDA NAKONU HO FIAR, ESPERANSA NO DOMIN BA EMA HOTU LIU-LIU BA FAMÍLIA SIRA NE’EBÉ LAKON FIAR, ESPERANSA NO DOMIN.

HAKEREK NO HATÁN

Please enter your comment!
Please enter your name here