TLPU ofisialmente simu afiliasaun TLPO liuhusi kongresu nasionál dalimak, sábadu (21/12/2019). Imajen/Mery Freitas

DILI, 23 dezembru 2019 (TATOLI)-Kongresu Nasionál Timor Leste Press Union (TLPU) ba dalimak, sesta-sábadu (20-21/2019),  simu mós afiliasaun husi membru Timor-Leste News Photographer Organization (TILPO).

Notísia Relevante : Manuel Pinto, Prezidente TLPU 2020-2024

Hahú iha tinan ne’e ba oin, TLPU hanesan organizasaun mahan ba jornalista iha Timor-Leste iha tan nia ramu foun ida ne’ebé hanesan TILPO ho nia misaun  halibur fotógrafu profisionál ne’ebé servisu ba órgaun komunikasaun sosiál ne’ebé eziste, hanesan iha Diáriu  Suara Timor Lorosa’e (STL), Diáriu Timor Post, Diáriu Nasionál no Semanáriu, Diáriu INDEPENDENTE, Dili Post, Ajénsia Notisioza Timor-Leste (TATOLI, I.P) no korrespondente Timor-oan sira ne’ebé hala’o knar profisionál nu’udar fotógrafu ba ajénsia internasionál; European Press Photo Agency (EPA), Reuters, AFP no AP.

Koordenadór TILPO, Lirio da Fonseca hateten, ezisténsia TILPO nu’udar oportunidade di’ak hodi halibur fotógrafu sira hodi hadi’a sira nia reportajen foto jornalizmu tuir ninia lala’ok profisionál.

“Prezensa TILPO iha TLPU nia mahon sai hanesan oportunidade di’ak ba ami jornalista, tanba durante ne’e, organizasaun ba fotógrafu seidauk iha. Nune’e ami inkilina iha TLPU nia okos hodi hala’o ami nia knaar iha foto jornalizmu nian,” dehan Lirio da Fonseca ba Ajénsia TATOLI iha ámbitu kongresu nasionál  TLPU iha Otél Golgota, Comoro, Dili.

TILPO hakarak organiza fotógrafu Timor-oan sira atu hadi’a kualidade servisu reportajen foto nian no bele fasilita formasaun oinsá mak bele opera kamera  hodi hasai anglo foto jornalizmu nian.

Atuál Fotógrafu Ajénsia Reuters, Lirio hatutan, ba oin TILPO sei koordena ho kolega fotógrafu sira hodi fahe esperiénsia no treinamentu kona-ba foto jornalizmu nian.

“Ami la taka dalan mós ba kolega sira bainhira hakarak sai membru hanesan foto jornalizmu. Tanba atividade ne’ebé ami halo ne’e atividade jornalizmu nian,” hateten Lirio Fonseca.

Inisiadór no Fundadór TLPU ne’e hatutan, ba oin sira sei koordena mós ho organizasaun fotógrafu internasionál sira atu mai fó treinamentu ba fotógrafu Timor-oan iha área oin-oin hodi aumenta sira nia koñesimentu.

Ba futuru bainhira organizasaun ne’e dezenvolve aan di’ak ona bele halo analiza ba foto sira ne’ebé média sira públiku tuir estandard (World Press Photo Foundation) ho kategoria hanesan, Spot Photo, General News Photo, People in The News Photo, Daily Life Photo, Potrait, Sport Photo Science and Technology Art and Culture, no Social and Environment

Iha tempu badak, organizasaun ne’e sei halo ninia kongresu hodi hili estrutura no diskute lema no naran husi TILPO hodi TLPU hatama naran organizasaun ne’e iha estatutu TLPU hodi legaliza organizasaun ne’e ninia atividade.

Iha fatin hanesan, fotógrafu Ajénsia TATOLI, Egas Cristóvão, konsidera ezisténsia TILPO importante hodi fahe esperiénsia ba malu entre fotógrafu sira iha área jornalizmu foto ninia.

Parte seluk, Prezidente eleitu TPLU, Manuel Ponto deklara ho ezisténsia TILPO sei reforsa di’ak liután knaar servisu husi TLPU nian oinsá apoiu servisu TILPO atu halibur profisionál fotógrafu sira atu organiza aan di’ak liután.

Manuel dehan, prezensa TLPO foin eziste, maibé dezde TLPU harii too mai agora estrutura TLPU halo kooperasaun servisu  di’ak ho Konsellu Imprensa Timor-Leste, Governu liu husi Sekretáriu Estadu Juventude Desportu (SEJD) durante ne’e fó formasaun ba joven sira iha iha área jornalizmu inklui halo kompetisaun ba foto jornalizmu iha kontestu oin-oin.

Jornalista          : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here