Administradór Postu Administrativu Ossu, Munisípiu Viqueque, Augusto de Sousa. Imajen TATOLI/Xisto Freitas

VIQUEQUE, 22 dezembru 2019 (TATOLI)–Administradór Postu Administrativu Ossu, Munisípiu Viqueque, Augusto de Sousa, hateten komunidade suku lima iha Postu Administrativu Ossu seidauk asesu ba enéjia eletrisidade hahú hosi tempu okupasaun Indonézia to’o ohin loron.

Nia haktuir, suku hirak-ne’e mak hanesan Waibobo, Nahareka, Liaruka, Builou no Wabubu.

“Suku hirak-ne’e mak agora daudaun seidauk asesu ba eletrisidade. Ita ba haree komunidade sei tuku kamii nafatin no balun halai buka minarai hodi asesu ba naroman. Ita haree  ida-ne’e triste loos,” Administradór postu ne’e tenik ba Agência Tatoli iha nia rezidénsia Viqueque Vila, domingu ne’e.

Autoridade postu ne’e hatutan povu suku lima la sofre de’it ba eletrisidade maibé sofre mós ba estrada ne’ebé kondisaun grave.

“Iha ne’ebá estrada mós aat. Tempu bailoron mak ita obriga an ba maibé iha tempu udan araska ita atu ba,” nia esplika.

Ema númeru ida iha Ossu ne’e subliña katak, antes ne’e, sira-nia parte submete ona proposta ba Governu sentrál atu tau-matan ba kestaun refere maibé laiha resposta to’o ohin loron.

“Ami-nia proposta hosi munisípiu hato’o ona ba Governu sentrál maibé laiha resposta to’o ohin loron. Sira mai haree dehan de’it mak di’ak maibé realidade to’o ohin loron laiha buat ruma. Hanesan iha tinan 2018 liubá, Vise Ministru Obra Públika mai ko’alia ho ami-nia komunidade dehan sei dada eletrisidade no halo estrada maibé la realiza to’o ohin loron. Estrada sira ne’e uluk tempu Indonézia nian ne’e mak nafatin hela ne’e,” nia haklaken.

Tanba ne’e, nia rekomenda ba Estadu liuliu Governu bele tau mós atensaun ba komunidade hirak ne’ebé iha hela susar laran ne’e.

“Nu’udar autoridade ida ha’u husu ba ita-nia governante sira iha leten aas ne’e labele interese de’it partidu nian. Labele interese de’it polítika nian maibé ita tenke koopera hamutuk para bele dezenvolve povu nia moris ne’e. Tanba ita haree funsionáriu no ema ne’ebé serbisu ona ne’e ita haree sira-nia moris la aat liu no ladi’ak liu maibé sufisiente ona. Maibé, ita-nia povu, kuitadu, moris aat nafatin,” Augusto informa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here