Aihan Nelio Restaurante. Imajen/Tatoli Egas Cristovao

DILI,23 dezembru 2019 (TATOLI)-Kazu inséndiu ne’ebé akontese, segunda ohin, iha Dili, rezulta ahi han motuk Nélio Restaurante iha área Metiaut, Kristu Rei, tanba deskonfia  kauza hosi sirkuitu eletrisidade.

Kazu ne’e akontese purvolta tuku 10:30 Otl; hodi  resulta salaun boot tolu ne’ebé bai-bain emprezáriu Timoroan ida uja hodi fó aluga ba kliente, osan, dokumentu estudante nian hanesan diplóma no sasan seluk tan motuk tanba la konsege salva.

Na’in ba Nélio Restaurante, Celestino Manuel Ximenes, relata nia laiha fatin, durante kazu ne’e mosu  maibé tuir informasaun hosi família katak,  kazu ne’e mosu fofoun, ahi han hosi uma kakuluk depois da’et ho velosidade lais ba edifísiu tomak hodi la konsege salva sasan hirak iha restaurante ne’e.

“Ho nune’e ha’u bá fó hatene Bombeirus mai para salva hodi hamate ahi,” informa, Celestino Manuel Ximenes, ba TATOLI, iha fatin akontesimentu.

Nia hatutan liután, maske deskonfia kazu ne’e mosu tanba sirkuitu eletrisidade,  maibé nia parte to’o dadaun ne’e,  seidauk hatene loloos motivu hosi akontesimentu  ne’e.

Iha fatin hanesan, Komandante Operasaun Bombeiru, Munisípiu Dili, Bruno da Costa Magalhaês, hateten, ekipa Bombeiru to’o kedas iha fatin akontesimentu hodi hamate ahi hafoin simu informasaun ne’e durante minutu sanulu resin.

Primeiru Komandante Bombeiros Timor-Leste, Bruno da Costa Magalhães.Imajen/ Tatoli Egas Cristovao

Ho intervensaun hosi ekipa Bombeiru ne’e,  maka konsege hamate ahi hodi la kontinua da’et tan ba edifísiu seluk ne’ebé konstrui besik iha fatin ne’ebá.

Entretantu, kazu inséndiu ne’e halo komunidade sira ne’ebé hela besik iha fatin ne’ebá paniku.

Jornalista:Nelson de Sousa

Editór:Francisco Simões

HAKEREK NO HATÁN

Please enter your comment!
Please enter your name here