Koordenadór 'Saúde na Família' hosi Sentru Saúde Uatulari, Bendito Magno. Imajen Tatoli/Xisto Freitas

UATULARI, 23 dezembru 2019 (TATOLI)–Koordenadór ‘Saúde na Família’ hosi Sentru Saúde Uatulari, Bendito Magno informa katak Sentru Saúde Uatulari enfrenta difikuldade ba ambulánsia no oksijéniu hodi halo atendimentu ba pasiente.

“Ami iha Sentru Saúde ne’e servisu la’o di’ak tebes maibé materiál komplementár mak sai hanesan problema ba ami. Materiál hirak-ne’e mak hanesan falta oksijéniu no ambulánsia,” Bendito ba Agência Tatoli iha Uatulari, Munisípiu Viqueque, segunda ne’e.

Nia haktuir, ambulánsia ne’ebé durante halo operasaun iha Uatulari daudaun ne’e kondisaun aat no retira ona ba fatin seluk hodi fó impaktu ba servisu saúde iha fatin refere.

Atu halo tratamentu, nia haktuir, dalan seluk sira tenke kontaktu ba pasiente nia família atu tula de’it ho karreta privadu bainhira ambulánisa hosi Uatucarbau no Viqueque Vila labele ajuda.

“Dalaruma ami-nia pasiente sira moras grave presiza tebes halo transferénsia ba Viqueque maibé laiha ambulánsia. Entaun, ami tenke husu tulun fali ambulánsia hosi Uatucarbau nian tanba Uatucarbau mak besik hodi ajuda lori pasiente ba Viqueque Vila. Ida-ne’e mak ami enfrenta,” nia haklaken.

Bendito salienta sira mós enfrenta difikuldade ba oksijéniu atu salva pasiente nia vida.

Difikuldade seluk, nia tenik, sira mós hasoru difikuldade ba eletrisidade tanba bainhira eletrisidade mate médiku sira iha Sentru Saúde refere susar tebes halo atendimentu ba inan isin-rua sira ne’ebé atu partu.

“La’ós ambulánsia ho oksijéniu de’it. Bainhira eletrisidade mate, ida-ne’e mós difikulta tebes ami-nia servisu. Tanba kalan ka madrugada ahi mate inan isin-rua sira mai atu partu, dalan seluk ami uza de’it lámpada ka leno de’it karreta nia lampu hodi fó partu ba inan isin-rua sira. Dalaruma mós tenke partu de’it iha li’ur atu bele leno ho karreta nia lampu. Ida-ne’e mak alternativu ne’ebé ami uza,” nia esplika.

Ho difikuldade hirak-ne’e, Bendito hateten, sira hato’o ona ba parte kompetente maibé seidauk iha solusaun pozitiva to’o ohin loron.

“Pedidu ami hato’o beibeik ona. Ami labele hato’o diretamete ba Ministériu Saúde maibé ami tenke hato’o liuhosi Sentru Saúde Munisipál depois sira mak relata ba nasionál. Maski nune’e, ami hein ba hein to’o ohin loron laiha rezultadu. Entaun, ami tenke buka alternativu seluk para fó benefísiu ba ita-nia populasaun,” nia katak.

Nia haktuir, ho difikuldade hirak ne’ebé iha halo komunidade dalabarak halo problema ho sira tan de’it fasilidade ne’ebé la sufisiente.

“Dalabarak ne’e pasiente sira mai diskute malu ho ami maibé ami labele halo buat ida. Ida-ne’e hosi nasionál mak la fó fasilidade sufisiente mai ami. Bainhira fasilidade kompletu, ami sei hala’o servisu hodi atende ita-nia pasiente sira ho dignu,” nia subliña.

Entretantu,  Postu Saúde sira iha Sentru Saúde Uatulari nia tutela mak hanesan Postu Saúde Matahoi, Uaitame, Hanodere, Sana, Iraler, Vesoru, Nunumalau, Kasabu no Makadiki.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here