Reprezentante SEKOMS Diretor DNDI, Esteváo da Costa Belo, hasai retraru hamutuk ho komunidade Aileu Sentru Informasaun iha Suku Liurai, Aileu. Imajen/Felicidade Ximenes

AILEU, 21 dezembru 2019 (TATOLI)—Reprezentante SEKOMS liu husi  Diretór Nasionál Diseminasaun Informasaun DNDI, Estevão da Costa Belo, hateten SEKOMS harii ona biblioteka iha sentru informasaun iha Suku Liurai, Aileu, hodi fornese livru no informasaun oioin ba komunidade sira.

“SEKOMS harii ona biblioteka iha sentru informasaun iha Suku Liurai, Aileu. Ha’u husu ba autoridade suku sira no koordenadór sentru informasaun sira atu tau matan no kuidadu didi’ak ekipamentu sira iha ne’e. Tanba, ekipamentu sira ne’e sosa ho osan povu ninian,” dehan Estevão da Costa Belo, iha ninia deskursu iha inaugurasaun sentru informasaun iha Suku Liurai, Aileu,  sábadu (21/12/19).

Nia hatutan, serimónia inagurasaun ba sentru informasaun iha Suku Liurai ne’e nu’udar kontinuasaun hosi atividade lansamentu programa Governu iha povu nia leet hanaran “Naroman Ba Suku”  ne’ebé SEKOMS lansa tiha ona iha fulan Setembru liu ba ne’e.

Antes organiza serimónia inaugurasaun ba sentru sira ne’e, nia esplika, SEKOMS transfere uluk ona fundus hodi halo instalasaun ekipamentu informátika ba sentru hodi organiza formasaun kona-ba jestaun, Citizen Journalism  no verba orsamentu ba serimónia inaugurasaun ne’e rasik.

Entretantu, Kordenadór Sentru Informasaun Suku Liurai, Luis da Costa, haktuir iha ninia relatoriu finál kona-ba sentru informasaun suku liurai nian  iha Munisípiu Aileu bé lansa programa  Naroman Ba Suku iha loron 27 setembru.

Nia esplika, harii sentru informasaun refere ho objetivu atu promove suku rurál no hakbiit komunidade sira-nia kapasidade hodi asesu ba informasaun.

Objetivu daruak, nia dehan, informa ba komunidade ho programa Oitavu Governu konstituisionál no rona komunidade sira-nia preokupasaun kona-ba dezenvolvimentu no trasmite ba Ministériu relevante sira.

Nia hatutan, objetivu datoluk mak hasa’e komunidade sira-nia koñesimentu kona-ba dalan no prosesu halo dalan implementasaun no dalan ba povu. No, nia dehan, objetivu dahaat hodi hasa’e ovu nia partisipasaun ativu iha dezenvolvimentu nasionál.

Jornalista : Felicidade Ximenes

Editór       : Rafi Belo

HAKEREK NO HATÁN

Please enter your comment!
Please enter your name here