Diretór Ezekutivu SABEH, Doutór Andrezinho Belo, simu prezente Natál husi Embaixadór Austrália iha Timor-Leste, Peter Roberts. Imajen/Embaixada Austrália iha Timor-Leste

DILI, 23 dezembru 2019 (TATOLI) – Organizasaun Lokál Saúde Ba Ema Hotu (SABEH), agradese ba prezente Natál ne’ebé oferese husi Embaixada Austrália no mós grupu timoroan sira ne’ebé serbisu iha Oxford ho naran Haksolok ho Imi. 

Diretór Ezekutivu SABEH, Doutór Andrezinho Belo, haksolok no agradese ba prezente ne’e atu bele fasilita di’ak liután médiku voluntáriu sira iha atividade tinan foun.

“Embaixada Austrália fó apoiu osan balun hodi suporta atividade SABEH nian ho montante $1000. Osan hirak ne’e, SABEH sei uza hodi hola ai-han, ai-moruk, no ekipamentu médiku ba programa outreach 2020 nian”, tenik Andrezinho iha ninia kna’ar fatin iha Delta, segunda ne’e.

Nune’e, nia dehan, SABEH ho voluntáriu tomak agredese ba Embaixada Austrália iha Timor-Leste, ba sira nia laran luak no matan kro’at hodi haree hetan servisu SABEH ne’ebé hala’o iha povu kiik no ki’ak nia leet.

“SABEH mós hetan doasaun husi Grupu Haksolok ho Imi, ne’ebé kompostu hosi timoroan sira ne’ebé servisu iha Oxford, hanesan prezente Natál. Ami mós agradese ba maluk sira ne’e nia laran luak. Montante ne’ebé sira ajuda $1.800, osan hirak ne’e sei uza ba hola sasan liga mós ho servisu iha área rurál”, nia akresenta.

Entretantu, komunikadu ne’ebé Agência Tatoli asesu, Embaixada Austrália iha Timor-Leste hateten, selebrasaun Natál nian besik daudaun ona no hanesan tempu ida ne’ebé baibain ema fó prezente ba malu.

“Ekipa Embaixada Austrália nian ho laran ksolok bele fornese prezente ki’ikoan balun ba grupu SABEH. Doasaun ida ne’e, organiza hosi ekipa Programa Kooperasaun Defeza Austrália nian liuhosi atividade sorteiu ka dada rifa Natál nian. Atividade ida ne’e, iha partisipante regulár sira ne’ebé maka mai hosi nasaun hamutuk sanulu-resin”, haktuir komunikadu.

SABEH maka grupu profesionál médiku ida ne’ebé maka la’o ba iha área remota sira iha Timór laran hodi fornese tratamentu médiku gratuita, promosaun saúde, no asisténsia jerál ba família sira, inklui ai-han no ropa sira.

Fatin hirak ne’ebé SABEH vizita, baibain presiza la’o kuaze oras lima ka liu no dalaruma bele to’o oras sanulu nia laran.

Foin lalais ne’e, SABEH hala’o sira-nia servisu iha Ermera hodi fó asisténsia médiku ba vítima sira ne’ebé maka hasoru ahi han rai.

SABEH servisu hamutuk ho voluntáriu kuaze na’in-200, ne’ebé ema na’in-80 nu’udar médiku profesionál no involve mós voluntáriu feto hamutuk na’in-120.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here