Xefe Suku Uaitame, Postu Administrativu Uatulari, Munisípiu Viqueque, José do Rosário. Imajen Tatoli/Xisto Freitas

UATULARI, 23 dezembru 2019 (TATOLI)–Xefe Suku Uaitame, Postu Administrativu Uatulari, Munisípiu Viqueque, José do Rosário hateten bailoron naruk (mudansa klimátika) afeta tebes ba komunidade ne’ebé halo toos iha Uaitame no Uatulari en-jerál.

“Loloos, dezembru nia laran batar sira komesa boot ona. Maibé, ida-ne’e laiha.  Ne’e atu tama tan janeiru ona batar seidauk kuda,” nia dehan ba Agência Tatoli iha nia rezidénsia, Uaitame, segunda ne’e.

Tanba ne’e, tuir nia, bainhira janeiru udan la mai sei mosu hamlaha boot tanba hahán tinan kotuk nian menus ona.

Iha parte seluk, José haktuir, liga ho bailoron naruk ne’ebé akontese halo animál barak iha fatin refere mak mate.

“Iha ne’e karau barak sai krekas-maran no barak mós mate ona tanba hahán laiha no bee-debu maran hotu,” nia haklaken.

Xefe Suku ne’e promete katak bainhira Natál no Tinan Foun ramata sei hato’o pedidu ba ministériu relevante atu hetan ajudu hodi prevene hamlaha.

Iha biban ne’e, José informa, tinan oin mak udan la mai, natar ektare 125 iha Uatulari mós sei abandonadu.

“Ami-nian ne’e populasaun sira moris de’it ho natar. Maibé, triste kuandu tinan oin udan la monu rai natar hirak-ne’e sei  abandonadu,” nia tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here