DILI, 23 dezembru 2019 (TATOLI)–Polítika Governu Konstitusionál Daualu liuhusi Ministériu Ensinu Superiór, Siénsia no Kultura (MESSK) mak buka nafatin meius atu eleva kualidade ensinu liuliu kualidade grau akadémiku ba dosente sira iha Instituisaun Ensinu Superiór Privada (IESP) ne’ebé mak sei lesiona ho grau lisensiatura, nune’e mós reforsa estrutura institutu públiku.
“Ita hatene katak oras ne’e daudaun 50% dosente sira iha institutu ensinu superiór privadu sira sei kontinua hanorin ho grau lisensiatura. Governu hanoin ona polítika ida ne’e tanba hakarak hadi’a no hasa’e mós nivel grau akademíku nian ba dosente sira liuhusi Fundu Dezenvolvimentu Kapital Umanu,” Ministru Ensinu Superiór Siénsia no Kultura, Longuinhos dos Santos hateten ba jornalista sira iha CCD (Sentru Konvensaun Dili, sigla portugés), ohin.
Nia akresenta, Governu liu husi MESSK iha responsalblidade bo’ot hakarak investe mós ba IESP sira atu nune’e ba futuru sira bele hasa’e liután kapasidade no formasaun ba dosente sira.
“Tanba sosiadade sira barak mak dezafia kona-ba produsaun estudante iha instituisaun ensinu privadu sira ne’eduni atu mellora di’ak liután kualidade iha setór lubuk ida iha instituisaun privada nian laran,” governante ne’e garante.
Notísia relevante:MESSK Halo Tratamentu Hanesan Ba Ensinu Superiór Sira
Jornalista : Tomé Amado
Editór : Rafy Belo
