Imajen EBC Nú. 13 Uatucarbau. Imajen Tatoli/Hortençio Sanchez

UATUCARBAU, 23 dezembru (TATOLI)–Diretór Ensinu Báziku Sentrál (EBC-sigla Portugés) Nú. 13 Uatucarbau, Alberto Fernandes, haklaken merenda eskolár iha Postu Administrativu Uatucarbau, iha problema tanba iha tinan 2019 kuaze estudante sira han dala 30 resin de’it.

“Iha ne’e merenda eskolár mak problema uitoan tanba nia implementasaun katak iha 2019 labarik sira han loron 30 resin de’it, enkuantu ninia loron efetivu iha aula ne’e loron 240 resin. Ida-ne’e mak problema ba ami,” Alberto ba Agéncia Tatoli iha nia rezidénsia, Postu Administrativu Uatucarbau, Munisípiu Viqueque, segunda ne’e.

Nia dehan, implementasaun merenda eskolár ladi’ak tanba bazeia ba orientasaun hosi munisípiu rasik.

Kona-ba menu hahán ba labarik sira, nia haktuir, eskola rasik mak fó. Tanba ne’e, grupu ne’ebé sai hanesan fornesedór sempre halo tuir.

“Menu ami mak fó ba grupu ida-ne’ebé fornesedór ne’e entaun sira tenke halo tuir ami. Uluk iha grupu tolu mak sai hanesan fornesedór maibé rua laiha ona tanba ami fó menu ba sira la te’in tuir menu ne’ebé ami fó. Nune’e, ami hapara sira no fó de’it ba grupu ida-ne’ebé te’in tuir menu ne’ebé ami fó,” Alberto esplika.

Nia hatutan, kada semana alunu sira han dala lima–modo tahan dala rua ho na’an no  mantolun dala tolu.

Diretór ne’e subliña só merenda eskolár mak problema maibé subsídiu la’o di’ak tebes.

“Só merenda eskolár mak iha problema maibé osan subsídiu ne’e la’o di’ak hela. Maski osan sai tarde maibé relatóriu ne’ebé ita halo tenke kondís ho osan ne’ebé sai. Dalaruma osan mai iha agostu, osan ne’e sai iha fulan-abríl entaun abríl ami halo fali relatóriu osan ne’e mai fali iha abríl nian. Foin lalais, ezame hotu ami ba simu tan osan fulan lima nian. Ne’ebé, osan subsídiu la’o kapa’as loos,” diretór ne’e esklarese.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here