Sentru Saúde Postu Administrativu Uatucarbau. Imajen Tatoli/Hortençio Sanchez

UATUCARBAU, 23 dezembru 2019 (TATOLI)–Xefe Sentru Saúde Postu Administrativu Uatucarbau, Germias Mota hateten kondisaun infraestrutura Sentru Saúde ne’ebé nia lidera daudaun ne’e kondisaun ladún sufisiente tanba kalén komesa dodok ona.

Kondisaun ida-ne’e, tuir nia, fó impaktu tebes ba médiku no pasiente sira iha tempu udan.

“Kondisaun Sentru Saúde ne’e kona-ba infraestrutura kalén sira dodok hotu ona no ai sira mós dodok hotu ona, tan ne’e presiza halo reabilitasaun,” Germias ba Agência Tatoli iha Uatucarbau, Munisípiu Viqueque, segunda ne’e.

Aleinde ne’e, Postu Saúde balun iha Uatucarbau mós kondisaun aat hotu liuliu didin uma nian ne’ebé maioria dodok hotu.

“La’ós Sentru Saúde de’it mak nia kondisaun aat. Postu sira mós kondisaun aat hotu. Postu Saude Loiulu ho Irabere mak presiza liu halo konstrusaun foun tanba suku rua ne’e durante ne’e uza de’it uma provizóriu ne’ebé oferese hosi programa Planu dezenvolvimentu Suku nian,” Germias haktuir.

Nia dehan, sira submete ona proposta ba Governu Sentrál no Munisipál maibé to’o ohin loron laiha resposta ruma.

“Proposta ami hatama dala hira ona ba Governu. Ami diskute bebeik ona iha reuniaun munisipál no nasionál atu halo reabilitasaun no konstrusaun foun ba Postu Saúde sira-ne’e maibé laiha rezultadu to’o agora,” nia subliña.

Nia husu ba Governu atu tau atensaun no iha tempu besik tenke halo lalais reabilitasaun ba Sentru Saúde no Postu Saúde hirak-ne’e nune’e bele atende komunidade ho di’ak iha fatin ne’ebé dignu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here