Diretór IDN, Donaciano Costa Gomes, Pedro Klamar Fuik. Imajen hosi google

DILI, 23 dezembru 2019 (TATOLI)–Atu hametin unidade institusionál liliu entre funsionáriu ho superiór sira, foin lalais ne’e, Institutu  Defeza Nasionál Timor-Leste selebra natal 2019,  no tinan foun 2020 hamutuk iha salaun IDN, Palasiu Governu Dili,  hodi kontribui ba dezenvolvimentu Timor-Leste ba futuru.

Durante serimonia ba selebrasaun ne’e, funsionáriu IDN ho  Estudante   ba kursu Promosaun Ofisiál Superiór (CEPOS),  Estudante Pos-Graduasaun Estudu Estratéjiku Resilensia Nasionál (PGEERN) rona mensajen furak ne’ebé tatoli hosi Diretór IDN, Donaciano Costa Gomes “Pedro Klamar Fuik” atu oinsa hametin liután relasaun entre funsionáriu atu koopera no tulun malu iha servisu fatin hodi dezevolve instituisaun estadu ne’e.

 “Natál konjuta ne’e  atu intensifika ita-nia relasaun hanesan umanu, konfidénsia ne’ebé maka imi iha, entre imi hanesan kolega, kuaze tinan ida, entre imi ho kolega funsionária IDN sira, ne’e sai hanesan referénsia ida iha imi-nia konfidénsia ba vida tomak,” katak Diretór IDN.

Nune’e mós ba formandu IDN. “Ho nune’e  ba Estudante CEPOS ho Pos-Graduasaun sira, imi-nia dedikasaun ne’ebé imi halo durante besik tinan ida, esforsu boot  ne’ebé imi halo tinan ida ne’e,  ita taka ho natál konjuntu. tinan oin termina kursu ne’e hodi kompleta  imi-nia programa eskolár,”tenik tan,  Eis Komandante hosi  Komponente Navál F-FDTL ne’e.

Tanba ne’e, nia dezafia formandu no funsionáriu sira atu esforsu aan no badinas nafatin iha servisu hodi atinji objetivu ida maka fó kontribui ba dezenvolvimentu nasaun.

 “Imi nia kursu promosaun imi tenke sente orgullu tanba imi bele maka halo to’o remata,  imi sei sente vantajen barak, maibé buat ne’ebé maka imi idaidak aprende hela ho imi  aplika iha imi-nia servisu no partilla tutan ho ema seluk,”Klamar Fuik, apela liután.

Tinan 2020, Nia konsidera nu’udar tinan  importante ba ema hotu-hotu atu halo reflesaun kona-ba prestasaun servisu ne’ebé maka funsionáriu sira kontribui ona ba susesu no dezafiu instituisaun nian hodi hadi’a di’ak liután.

Jornalista: Eugénio Pereira.

Editór:Francisco Simões

HAKEREK NO HATÁN

Please enter your comment!
Please enter your name here