Diretóra Executivo Fundasaun Alola, Maria Imaculada Guterres. Imajen/ Tatoli Egas Cristovão

DILI, 19 dezembru 2019 (TATOLI)—Diretora Ezekutiva Fundasaun ALOLA, Maria Imaculada Guterres, hamutuk ho parseiru dezenvolvimentu hanesan United Nations Childrens Fund (UNICEF), Organizasaun Mundiál Saúde (OMS), Uniaun Europeia, no Ministériu Saúde lansa “Lidun Akonselamentu Fó Susu Ba Bebe” (Breast Feeding) dahuluk iha Hospitál Nasionál Guido Valadares, Dili.

Nia hatutan, ida ne’e hanesan fatin ida apoia di’ak liután inan ho bebe.  Karik, ida ne’e mak susesu Fundasaun Alola sei halo planu hamutuk ho UNICEF, Organizasaun Mundial Saúde (OMS) hamutuk ho Ministériu Saúde estabelese no habelar tan mós iha sentru saúde sira iha munisípiu sira seluk.

“Fatin ‘Lidun Akonselamentu Fó Susu ba Bebé (Breast Feeding) ida ne’e dahuluk ita estabelese iha Hospital Nasional Guido Valadares,” Diretora Ezekutiva Fundasaun ALOLA, Maria Imaculada Guterres ba Jornalista sira banhira remata hala’o lansamentu ba “Lidun Akonselamentu Fó Susu Ba Bebé” iha HNGV, ohin.

Fatin ida ne’e, nia hatutan, ninia trajetu maka liu-liu inan ho bebé atu fó susu ba bebe, inan ne’ebé mak mai ho oan na’in rua no hanesan mai ho labarik tinan tolu, tinan haat, bele mós mai iha fatin ne’e.

“Fatin ne’e la’os de’it trajetu ba inan sira iha ne’e maibé mós ba inan sira ne’ebé partus iha liur ne’ebé hetan dezafiu ka problema kona-ba fó susu bebé, sira bele mai asesu ba lidun ida ne’e,” nia informa.

Akonselamentu sira ne’e, nia dehan, kona-ba benefísiu inan fó susu ba bebé sira hotu katak iha ona konsiénsia oinsá ita kapasita diak liután, liu-liu bele hetan apoiu husi família uma laran rasik henesan kaben, avó, ita bele garantia katak fó susu ba bebe susesu to’o iha fulan neen (6).

Atu garantia susesu, nia hateten, sei regula formasaun komersiál husi hahan sira ne’ebé mak fa’an iha loja sira no iha Estrada ninin, ida ne’e atu labele promove hahan hirak ne’e atu sai idealiza produtu. Maibé, nia dehan, tenke iha esplikasaun katak inan nia susu been mak nafatin ai-han ne’ebé di’ak liu ba bebé sira.

“Foin daudaun ami mós hetan konvite husi OMS no apoiu husi Ministériu Saúde fahe informasaun hala’o Kongresu Nasionál ida ne’e ba iha atu bele hasa’e konsiénsia katak ita presiza atu proteje susu been komersiál ka produtu hanesan supeta, bibiron, han hemu sira ne’ebé haleu ita. Tanba haree nasaun barak mak tama mai iha ne’e, produtu susu been oin-oin atu atrai inan sira para uza no husik hela inan sira han hemu fó risku ba bebé sira-nia saúde iha loron aban,” diretora ne’e hateten.

Nia esplika, tuir Fundasaun Alola nia estudu demografia saúde ne’ebé maka halo iha tinan 2016 ninia rezultadu hatudu katak taxa husi inkluzivu inan fó susu been ba bebé fulan neen ne’e tun 52% antes estudu demografia saúde 2009-2010. Maibé, tuir nia, estudu ikus iha tinan 2016 ninia tun ba iha 50%.

Ida ne’e, nia haklaken, hanesan problema ida ne’ebé ita presiza tau atensaun bele hasa’e númeru liu husi servisu ka apoiu asaun ruma mak atu bele apoiu di’ak liután. Alende edukasaun ba inan sira, hala’o mós edukasaun ba pesoál saúde sira hanesan fornesedór inan atu bele apoiu di’ak liután liuliu hare’e obstákulu inan sira fó susu ba bebé bele susesu.

Tanba ne’e, nia apela ba inan sira ne’ebé mak fó susu ba bebé kontinua fó susu ba bebe ho di’ak tanba wainhira fó susu ba bebe liu-liu bebé sira fulan neen (6) mai kraik, sei garantia kresimentu di’ak ba bebé.

“Se ita-boot sira alta husi ospitál ne’e ba liur kontinua fó susu iha uma, karik hetan problema ruma tenke mai iha “Lidun Akonselamentu” ne’e ita-nia pesoál saúde sira no ita-nia nan sira bele servisu iha lidun akonselamentu sei prontu atu apoiu ita-boot sira fó susesu ba bebe sira,” nia dehan.

Jornalista : Felicidade Ximenes
Editór       : Rafi Belo

HAKEREK NO HATÁN

Please enter your comment!
Please enter your name here