Oan feto saudozu Gaspar de Carvalho, Dorteia Alves. Imajen Tatoli/Domingos Piedade Freitas

UATUCARBAU, 23 dezembru 2019 (TATOLI)–Família hosi saudozu Gaspar de Carvalho seidauk asesu ba pensaun Estadu ne’ebé pertense ba saudozu ne’e.

Kestaun ne’e fó sai husi oan feto saudozu, Dorteia Alves ba Agência TATOLI iha nia rezidénsia, Postu Administrativu Uatucarbau, Munisípiu Viqueque, segunda ne’e.

Nia haktuir, ninia aman militár Indonézia liuliu Nangala Piton 12 ho timoroan balun mak kaptura saudozu iha tinan 1984, bainhira saudozu ne’e halo hela serbisu rezisténsia nian iha seksaun justisa inklui mós serbisu sekretáriu suku iha Uatucarabau.

“Ha’u-nia aman la’ós kapturadu de’it husi militár Indonézia maibé mós husi timoroan balun mak fó dalan hodi kastigu tinan 1 iha Uatucarabau no ikus mai militár oho to’o ohin loron ami la hatene ninia paradeiru”, Dorteia dehan.

Nia husu ba Estadu Timor-Leste presiza toma atensaun atu buka tuir mártir ne’ebe mak mate ona inklúi mós ninia aman ne’ebé fó ona sira-nia raan no mate ba rai ida-ne’e.

Dorteia rekoñese katak ninia aman nia naran nia rejista ona iha Komisaun Omenájen, maibé to’o ohin loron seidauk hetan pensaun hosi Estadu.

Maski nune’e, nia otimista katak tempu badak liuhusi Komisaun Verifikasaun Dadus Veteranu bele hetan subsídiu husi Estadu Timor-Leste.

Saudozu husik hela feen ho naran Alda Alves no oan na’in-10. Entre oan na’in-10 ne’e, na’in-3 mate ona, oan 7 mak sei moris (mane 4 no feto 3).

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here