Sesaun plenária Parlamentu Nasionál. Imajen/Tatoli

DILI, 23 dezembru 2019 (TATOLI) – Bankada Parlamentár Frente Revolucionária Timor-Leste Independente (FRETILIN), preokupa ho pedidu debate ho karakter urjénsia no konsidera Proposta Lei Orsamentu Jerál Estadu (OJE) 2020 foun ne’ebé Governu submete iha loron 19 dezembru inválidu.

Tuir nota hosi Bankada FRETILIN, ne’ebé Agência TATOLI asesu iha segunda ne’e, Bankada Opozisaun ne’e preokupa ho pedidu Governu ba prosesu urjente, tanba konsidera nu’udar tentativa atu la fó tempu ba Parlamentu Nasionál (PN) hodi haree kle’an proposta foun.

Iha sesaun plenaria segunda (23/12), Bankada FRETILIN deside la vota ba pedidu atu debate Proposta Lei OJE 2020 ho kategoria urjénsia, tanba fundamentu sira ne’ebé aprezenta husi VIII Governu Konstitusionál la konsege konvense no la justifika pedidu ne’e rasik.

Nune’e, nota ne’e esplika, Bankada FRETILIN haree ba informasaun katak Primeiru-Ministru, Taur Matan Ruak foti férias to’o loron 6 janeiru no Xefe Governu rasik ladún haree nesesidade urjénsia.

Husi parte seluk, Bankada Opozisaun ne’e la konkorda ho argumentu husi Vise-Prezidente Parlamentu Nasionál, Maria Angelina no Ministru Reforma Lejizlativa no Asuntu Parlamentár, Fidelis Leita Magalhães, ne’ebé dehan proposta orsamentu ne’ebé foin hatama iha semana kotuk hanesan kontinuasaun ba prosesu ne’ebé hahú iha fulan outubru foin liu bá.

“Haree ba Lei no Rejimentu Parlamentu Nasionál (RPN) ne’ebé vigora, bainhira Governu retira proposta dahuluk OJE 2020, proposta lei ne’e rasik la válidu ona”, refere Komunikadu Imprensa Bankada FRETILIN.

Nune’e mós, proposta lei ne’ebé foin submete ba PN iha loron 19 novembru, nu’udar proposta lei foun no tenki tuir prosedimentu RPN no Lei ne’ebé vigór, hodi garante katak membru Parlamentu sira analiza no debate ne’ebé kle’an ho atensaun no kuidadu ne’ebé nesesáriu, atu nune’e labele husik liu irregularidade balun.

Bankada FRETILIN haree mós katak iha tentativa husi VIII Governu, Meza Parlamentu no deputadu sira husi Bankada Governu, atu ansi debate ba Proposta Lei OJE 2020.

“La’ós ho intensaun tanba hanoin nesesidade povu, maibé atu la fó tempu atu membru Parlamentu sira haree didi’ak ba dokumentu foun sira ne’e no atu koko taka falta balun ne’ebé Proposta Lei OJE 2020 bele iha, hanesan proposta ne’ebé retira”, Haktuir nota hosi Bankada.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here