Prezidente APORTIL, Flavio Cardoso Neves. Imajen/Antonio Goncalves.

DILI, 23 dezembru 2019 (TATOLI) – Konsellu Administrasaun Autoridade Portuáriu Timor-Leste (APORTIL,IP), hahú husi janeiru to’o novembru tinan ne’e (2019) arrekada reseita hamutuk millaun $3,8-resin.

“Ami rekolla reseita millaun $3,8-resin, ne’e hahú husi janeiru to’o novembru ne’ebé hatama ona ba kofre Estadu”, Prezidente Konsellu Administrasaun Autoridade Portuáriu Timor-Leste (APORTIL, IP), Flávio Cardoso Neves, ba TATOLI hafoin enkontru ho Ministru Transporte no Komunikasaun iha Kaikoli, ohin.

Flávio Cardoso Neves friza kálkulu to’o fin dezembru tinan ne’e (2019), reseita bele to’o millaun $4,5 tanba iha dezembru atividade operasaun iha portu ne’e makaas liu.

Prezidente APORTIL ne’e adianta reseita ne’e maioria mai husi Nakroma ne’ebé kada tinan rihun $500 to’o rihun $800, husi ró atraka iha portu, demurrage ka sobrestadia, port service ne’ebé sei uza sistema manuál.

“Iha 2020, ha’u hakarak muda sistema selu taxa bele uza sistema dijitál ka bá selu iha banku atubele transparente no asegura ba reseita ne’ebé portu sira rekolla”, adianta.

APORTIL nia knaar atu rekolla reseita ba kofre Estadu, maibé presiza mós hadi’a kondisaun no atendimentu ba públiku atu ema selu taxa ho di’ak tuir baze legál ne’ebé iha.

Ezekusaun Aportil Atinje 85%

Prezidente APORTIL Flávio Cardoso Neves dehan ezekusaun orsamentu Autoridade Portuáriu husi montante millaun $3,3 iha 20 dezembru taka anu fiskál ba OJE 2019 atinje ona 85%.

“Ami-nia ezekusaun bele hateten to’o fin-du-anu 90% tanba orsamentu operasaun balun seidauk gasta kuandu gasta tan bele to’o ida ne’e”, katak.

Signifika katak APORTIL nia atividade no planu ne’ebé aloka orsamentu konsege realiza hotu, nia problema seidauk konsege selu to’o porsentu 100 tanba selu de’it tuir prestasaun servisu ne’ebé iha.

“ En-jerál ami-nia ezekusaun di’ak, maibé importante mak servisu ne’e iha kualidade, la’ós gasta osan de’it, maibé importante atividade no planu ne’e iha benefísiu”, afirma.

Ba 2020, nia dehan APORTIL sei foku ba atividade ida ne’ebé mak benefísiu, liuliu hadi’a terminál portu no seluk ne’ebé ladún importante sei la foku tanba kuandu portu Tibar di’ak ne’e atividade hotu-hotu muda ba iha ne’ebá.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here