Administradór Munisipál Viqueque, Gregório Hendrique. Imajen TATOLI/Xisto Freitas

VIQUEQUE, 22 dezembru 2019 (TATOLI)–Administradór Munisipál Viqueque, Gregório Hendrique, klarifika katak ninia parte seidauk simu informasaun formál muda fábrika Gás Naturál Likéfetu (LNG-sigla inglés) ba fali Postu Administrativu Natarbora, Munisípiu Manatuto.

“Ha’u hanoin projetu LNG ne’ebé mak lokaliza iha Beaço, Suku Maluro, Postu Administrativu Viqueque, Munisípiu Viqueque, muda fali ba Natarbora nia parte seidauk simu informasaun formál hanesan karta eskrita ruma husi Governu Sentrál”, nia tenik ba Agência Tatoli, iha nia rezidénsia Viqueque Vila, ohin.

Nia hatutan, karik Governu Sentrál muda LNG muda fali ba Natarbora, ne’e kompeténsia Governu nian tanba Viqueque oan hotu la unidu iha desizaun koletivu liuliu ba indemnizasaun nian mak deskonfia balun husu boot demais ba Governu liuhusi Timor Gap (kuaze biliaun $1).

“Karik Governu mak muda duni ba Natarbora, nu’udar Viqueque oan sente triste tebes”, nia afirma.

Maski nune’e, nu’udar autoridade munisípiu husu ba Viqueque oan hotu atu foti desizaun ruma tenke fó hanoin ba malu hanesan administradór postu no administradór munisípiu, xefe suku, xefe aldeia inklúi mós matenek-na’in sira seluk atu tuur hamutuk hodi foti desizaun ne’ebé mak di’akliu.

Maibé, kuandu halo buat ruma mak nonook no husu indemnizasaun boot demais, tuir Gregório, ninia konsekuénsia mak LNG la mai iha Beaço.

Iha semana kotuk, Negosiadór Prinsipál asuntu Delimitasaun Fronteira Marítima no Terrestre, Kay Rala Xanana Gusmão hahú identifika fali fatin plataforma LNG nian iha Natarbora, lahó razaun ne’ebé klaru katak atu muda duni plataforma mai Natarbora ka lae.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here