Eis Xefe Aldeia Lamac Laran, Augusto da Costa iha entrevista ho jornalista Agência Tatoli. Imajen TATOLI/Xisto Freitas

VIQUEQUE, 22 dezembru 2019 (TATOLI)–Komunidade aldeia haat kompostu Aldeia Lamac Laran, Cabira Oan, Has Abut no Mamulak iha Suku Caraubalo, Postu Administrativu Viqueque, Munisípiu Viqueque, konsome bee mota (mota Kuha), kauza husi bailoron naruk ‘El Nino’ rezulta bee maran.

“Ha’u hanoin aldeia haat iha tempu bailoron ne’ebe mak naruk tenke konsome bee mota ba nesesidade loroloron kuaze fulan haat ona”, eis Xefe Aldeia Lamac Laran, Augusto da Costa tenik ba Agência TATOLI, bainhira observa direta ba konstrusaun ponte suspensa (jembatan gantung-termu Indonézia) iha Aldeia Lamac Laran, ohin.

Augusto esplika komunidade konsiente katak bainhira konsome bee mota hodi te’in no hemu la saudável maibe pansiénsia tenke uza tanba bee-matan iha aldeia haat ne’e maran-dekor ona.

Tanba ne’e, nia parte husu ba dirijente administrasaun munisipál nian atu bele toma atensaun, oinsá mak dada bee-moos husi Loihunu (Postu Administrativu Ossu) atu sira labele konsome bee mota.

Hatán ba kestaun ne’e, Administradór Munisipál Viqueque, Gregório Henrique rekoñese katak iha tinan 2019, tempu bailoron ne’ebe mak naruk halo bee-matan iha Viqueque laran kuaze maran maibé komunidade mak tenke buka bee rasik hodi konsome.

“Ha’u hanoin oras ne’e daudaun bee iha Loihunu mós menus ona, nune’e atu fornese bee ba komunidade la’ós fasil. Tanba ne’e, ha’u husu komunidade tenke buka rasik bee hodi konsome”, Gregório ba Tatoli iha nia rezidénsia Viqueque Vila, ohin.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here