Bee-matan Loihunu, Postu Administrativu Ossu, Munisípiu Viqueque. Imajen espesiál

VIQUEQUE, 22 dezembru 2019 (TATOLI)–Administradór Munisipál Viqueque, Gregório Henrique, hateten bailoron naruk halo bee-matan Loihunu, Postu Administrativo Ossu, menus iha ne’ebé afeta tebes ba komunidade Viqueque atu asesu ba bee-moos.

“Bee-matan hosi Loihunu afeta ba komunidade Viqueque. Hanesan agora ema atu fase ropa de’it mós araska,” Administradór ne’e ba Agéncia Tatoli iha nia rezidénsia Viqueque Vila, domingu ne’e.

Nia dehan, problema ne’e akontese tanba afeta hosi natureza (mudansa klimátika). Tanba ne’e, dalan ne’ebé atu rezolve só komunidade mak buka alternativu.

“Ida-ne’e problema natureza. Entaun, komunidade mak haree oinsá atu buka bee hodi uza. Bee bele menus mós Viqueque baibain de’it. Ema ida seidauk mate ba bee iha Viqueque ne’e. Ema ida-idak hatene ona sira atu kuru bee iha ne’ebé. Ne’ebé, laiha problema ba ida-ne’e,” Gregório haktuir.

Nia hatutan, Administrasaun Munisipál laiha dalan atu fasilita bee ba komunidade.

“Durante ne’e ita organiza bee to’o. Agora bee laiha tanba udan la tau ita atu fasilita halo nusa. Bee atu foti hosi ne’ebé. Bee mak menus duni. Ita bele lori kanu barabarak mai dada tun-sa’e mós bee laiha ne’e ita atu halo oinsá,” nia subliña.

Ema númeru ida iha Viqueque ne’e konta, hahú hosi tempu okupasaun Indonézia to’o ohin loron komunidade Viqueque seidauk halo pagamentu ba bee tanba seidauk iha regra.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here