Konstrusaun Ponte Suspensa iha Suku Caraubalo, Munisípiu Viqueque. Imajen TATOLI/Xisto Freitas

VIQUEQUE, 22 dezembru 2019 (TATOLI)–Aldeia haat kompostu hosi Lamac Laran, Cabira Oan, Has Abut, Mamulak, iha suku Caraubalo, Postu Administrativu Viqueque, Munisípiu Viqueque, asesu ona ponte suspensa (jembatan gantung-termu Indonézia).

Ponte refere atu fasilita movimentu komunidade tanba durante ne’e komunidade aldeia haat refere tenke la’o kilómetru ida ho balun no tenke hale’u mota mak foin bele hakat ba mota sorin iha tempu udan.

Virgílio de Jesus nu’udar diretór kompañia Sana Unip Lda ba Agência TATOLI, iha Suku Caraubalo, domingu ne’e, katak ninia kompañia mak kona projetu ne’e maibé sub kontratu fali ba kompañia Arquires Lda hodi realiza konstrusaun.

Nia haktuir katak proposta konstrusaun ba ponte refere sira hatama ba Gabinete Primeiru-Ministru, Kay Rala Xanana Gusmão inklui mós Ministériu Obra Públika (MOP) no Ajénsia Dezenvolvimentu Nasionál (ADN) iha tinan 2015 liubá no hetan aprovasaun iha tinan 2017.

Virgílio informa katak obra ne’e la’o tarde (realiza iha 2017 nia rohan) tanba kestaun oioin hanesan transferénsia finanseira ba konta bankária tarde no atraza iha estudu tanba tenke halo estudu ida kle’an atu bele harii ponte ho kualidade.

“Ha’u hanoin ponte suspensa ne’e importante tebes ba komunidade liuliu estudante sira husi Eskola Sekundária 04 de Setembro inklui mós pre sekundária sira ne’ebé mak hala’o hela sira-nia prosesu aprendizajen husi mota sorin mai mota sorin”, nia haklaken.

Ponte ho medida naruk metru 96, aas metru 15 hosi mota no luan metru 2 ho balun ne’e gasta orsamentu hamutuk millaun $750.

Virgílio esplika, kuandu ponte ne’e finalizadu, ema la’o ain no uza motór mak bele liu, maibé proibe ba karreta atu liu ho intensaun atu asegura ponte ne’e ba tempu naruk.

Entretantu, Augosto da Costa, nu’udar abitante hato’o nia sentimentu kontente tebes ba konstrusaun ponte ne’e.

“Ha’u sente kontente tebetebes tanba ponte ne’e bele fasilita ona komunidade no estudante sira iha tempu udan”, nia agradese.

Eis Xefe Aldeia Lamac Laran ne’e mos husu ba kompanñia atu bele aselera lalais serbisu atu molok tama tinan foun bele utiliza ona ponte refere.

Tuir planu, iha meiadu tinan oin, konstrusaun ponte refere sei finalizadu.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here