Diretór Komisaun Justisa no Pás, Dioseze Dili, Pe. Hermínio Gonçalves. Imajen/Cipriano Colo

DILI, 21 dezembru 2019 (TATOLI)-“Ukun Rasik-aan, Verdadeira Liberdade no Libertasaun”. Ne’e mak tópiku sentrál husi programa debate públiku Timor-Leste Voice of the Voicelees (TLVoV) ba dalimak ne’ebé organiza husi Komisaun Nasional Justisa no Pás (CJNP-sigla portugés) Dioseze Dili.

Notisia Relevante : CNJP Kria Debate “Voices Of The Voiceless”

Debate públiku ba tinan ne’e, aprezenta panelista mai husi reprezentante veteranu, Laureadu Nobel ba Pás nian, José Ramos Horta, reprezentante Igreja Katólika no reprezentante komunidade Kristaun Protestante, jurista, akadémiku no reprezentante Polisia Nasional Timor-Leste (PNTL).

Padre Hermínio de Fátima Gonçalves, diretór Komisaun Justisa no Pás Dioseze Dili hanesan mós prezidente komisaun organizadora esplika,  tópiku temátiku ne’e refleta ba esperansa no realidade Timor nian iha tempu luta ne’ebé kaer metin ba prinsípiu tenke  iha verdade ka verdadeira iha ukun rasik-aan.

“Ita hateke ba kotuk tempu okupasaun nian, Timor-oan kaer metin prinsípiu ida katak verdadeira liberdade. Asuntu hanesan justisa, pás, liberdade no direitu umanu, ita sei hamutuk iha liberdade nia laran hodi lia loos mak hodi kombate ba lia falsu no lia bosok. Maibé to’o ikus ita liberdade ona no hamate lia falsu no lia bosok,” hateten amu Hermínio de Fátima Gonçalves.

Tuir nia haree, ukun rasik-aan iha ona verdade ka verdadeira, maibé dezafiu boot mak, ema ki’ak no mukit sei barak. Tanba ne’e presiza iha esforsu libertasaun husi mukit no ki’ak.

“Pelumenus fó inspirasaun ba ema ne’ebé kbiit laek atu halo mudansa,” hateten Amu Hermínio.

Iha fatin hanesan pastor igreja protestante Timor-Leste (IPTL) Hosana, Lourenso dos Santos, husu ba lideransa sira atu kria unidade no pás hodi lori nasaun Timor ne’e ba futuru.

“Se lae, ita mak moris nafatin iha kiak mukit nia laran, seidauk asesu ba edukasaun, saúde, eletrisidade, estrada no asesu ba merkadoria mós seidauk iha”.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here