Ambiente serimónia Natal hamutuk entre Prezidente Repúblika, Francisco Guterres Lú Olo ho Espoza, hamutuk ho família boot Palásiu Prezidensiál. Imajen TATOLI/Cipriano Colo

DILI, 21 dezembru 2019 (TATOLI)–Prezidente Repúblika, Francisco Guterres Lú Olo, husu família boot Palásiu Prezidénsia Repúblika atu ho espíritu Natal nian iha tinan ne’e, identidade Kristaun ho nia valór ne’ebé boot liu mak hadomi malu, respeita malu no simu malu, hanesan Jesus Kristu hanorin. 

“Iha feriadu loron Idul Adha no Idul Fitri ita selebra hamutuk, nune’e mós iha kuadra natalísia ita selebra hamutuk Jesus Kristu nia moris. Ho Espíritu Natal nian ita reafirma ita-nia identidade Kristaun ho nia valór ne’ebé boot liu mak hadomi malu, respeita malu no simu malu, hanesan Jesus Kristu hanorin ita!”, Prezidente Repúblika hateten iha serimónia Natal hamutuk ho funsionáriu sira iha Palásiu Prezidente Nicolau Lobato, Bairru Pité, Dili, ohin.

Xefe Estadu informa ohin família boot Palásiu Prezidensiál halibur malu atu selebra Natal hamutuk dala ida tan, ho ksolok, dame, domin no toleránsia.

Nia husu katak Natal, iha kuadra festiva ida-ne’e tempu mós atu halo reflesaun no balansu kona-ba saida mak akontese iha tinan 2019, ne’ebé besik atu ramata, no hanoin didi’ak saida mak sei mehi ba tinan foun 2020.

Aman nasaun ne’e fó hanoin katak, iha tinan 2019, selebra hamutuk eventu istóriku boot rua mak hanesan, tinan ruanulu (20) husi Referendu ne’ebé lori timoroan hotu hamriik nu’udár nasaun livre no independente no tinan tolunulu (30) husi vizita Amu Papa S. João Paulo II mai Timor-Leste hodi reafirma no eleva timoroan hotu nia identidade kristaun.

“Ita iha fiar no esperansa katak Amu Papa sei mai vizita ita-nia nasaun livre no independente!”, PR Lú Olo fiar.

Iha biban ne’e, Prezidente Repúblika rekoñese katak buat barak nia promete, maibé la halo iha tinan tuan ida-ne’e, ne’ebé nakonu ho dezafiu oioin.

Maski nune’e, nia fiar katak tinan foun fó oportunidade hodi renova no reafirma identidade Kristaun, tanba timoroan hakarak moris ho pás no estabilidade, hanesan kondisaun bázika ba moris di’ak.

“Ita tenke aproveita oportunidade ida-ne’e hodi hanoin saida mak ita hakarak realiza iha tinan foun 2020! Ha’u-nia mensajen ba ita hotu mak halo reflesaun rasik hodi hanoin saida mak ita bele halo hodi kontribui ba implementa valór sira ne’ebé ita-nia identidade kristaun hatudu mai ita, liuhusi: diálogu ka koa’lia ba malu, kombate ki’ak iha ita-nia nasaun no hanoin filafali dezenvolvimentu ne’ebé ita hakarak ba ita-nia nasaun, dezenvolvimentu ida-ne’ebé foka liubá ema nu’udár umanu no enkuantu sidadaun”, nia haklaken.

Nia subliña katak Natal nu’udár festa família nian! Iha família laran mak fatin dahuluk hodi transmite valór husu inan no aman ba oan sira, husi avó sira ba beioan sira, husi bin no maun sira ba alin sira!

“Ha’u ho ha’u-nia família tomak dezeja ba imi ida-idak ho imi-nia família Santu Natal no prósperu Ano Novo, nakonu ho pás, domin no ksolok”, mensajen ba família boot Palásiu Prezidensiál.

Xefe Estadu mós hato’o Obrigadu wa’in ba apoiu tomak ne’ebé família boot Palásiu Prezidensiál fó ba Prezidente Repúblika durante tinan 2019 no Prezidente Repúblika ho família konta nafatin ho família boot Palásiu Prezidensiál nia apoiu, dedikasaun no amizade iha tinan foun 2020!

Iha serimónia ne’e, Prezidénsia Repúblika valoriza nia funsionáriu públiku ne’ebé durante tinan-2019 hatudu prestasaun di’ak hamutuk na’in lima no sai ezemplár iha primeiru órgaun Timor-Leste, inklui funsionáriu na’in rua ne’ebé reforma ona.

Valorizasaun ne’e liuhusi prémiu no sertifikadu rekoñesimentu ne’ebé entrega diretamente husi Prezidente Repúblika, Francisco Guterres Lú Olo.

Aleinde ne’e, Prezidente Repúblika, Francisco Guterres Lú Olo, hato’o agradesimentu ba emprezáriu nasionál no internasionál ne’ebé apoiu ona vítima inséndiu no dezastre naturál iha Munisípiu Ermera inklui Quelicai no fatin seluk tan.

Natal hamutuk entre Prezidente Repúblika ho espoza no funsionáriu Palásiu Prezidensiál, partisipa husi Arsebispu Metropolitanu Arkedioseze Dili, Don Virgílio do Carmo da Silva, SDB, Xefe Kaza Sivíl Prezidénsia Repúblika, Francisco Maria de Vasconcelos, asesór sira, diretór sira no funsionáriu sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here