Reitór UNPAZ eleitu, Adolmando Soares Amaral. Foto TATOLI/Tomé Amado

DILI, 19 dezembru 2019 (TATOLI)–Magnifiku Reitór Universidade da Paz (UNPAZ), Adolmando Soares Amaral, hateten tinan 2020 iha planu foun no iha planu tomak kona-ba akademiku sei halo mudansa ho estrutura anteriór.

“Depois de Profesor Doutor Lucas da Costa laiha, fundasaun hasai despaisu ida bele halo fali eleisaun ba reitór foun no mai ho programa akademiku foun. Programa foun ne’e agora ami tenke implementa kedas iha tinan 2020 ba oin no tenke halo mudansa ba iha kalendáriu akademika,” dehan Adolmando Soares Amaral  ba Ajénsia TATOLI, bainhira ramata partisipa Judisium Fakuldade Teknológia Agrikola, iha salaun UNPAZ, Dili, kinta (19/12/2019).

Nia hatutan, durante ne’e Universidade da Paz (UNPAZ) la’o hela ho pakote maibe agora halo kreditu semester de’it.

Kona-ba kreditu semester, nia esaplika, parte universidade ajusta fali iha unidade sira ne’ebé uluk direitamente ba reitór no re-entrega hotu iha pro-reitór haat ne’ebé iha no mós departamentu sira koloka hotu ba iha fakuldade hodi hamosu tan unidade sira ne’ebé foun.

Tuir nia, Unidade foun ne’e sira harii mak unidade inovativu no kreativu ne’ebé lori estudante sira iha UNPAZ hodi transforma produtu lokais hanesan hudi abut no tahan sai ba iha rebusadu, ainanas ba mermelada no hudi tahan bele sai ba kadernu.

“Mais ema nunka hatene. Tanba ne’e mak ami hamosu unidade ida ne’e ba oin tuir potensia ita iha. Estudante sira ne’ebé kretaivu no iha kreatividade ba iha inovasaun sira ne’e, ita lori kedan ba iha unidade ida ita bolu unidade ideia inovativu no kreativu. Depois sira bele dezenvolve liután hodi públika ba iha públiku para públiku bele asesu ba inovasaun sira ne’e,” Magnifiku Reitór UNPAZ esplika.

Nia hatutan, produsaun hirak ne’e hanesan industria ne’e, iha mós inovasaun ida taka ahi-oan (eletrisidade) lori de’it no liuhusi telephone husi distansia dook de’it.

“Ezemplu, Ita husi uma mai ita haluha hela ahi-oan la taka, eletrisidade la mate, ita husi ne’e, ita bele program de’it tama iha ne’e automatikamente ahi-oan iha uma mate mesak. Ida ne’e mak agora ami hakarak ami muda para depois divulga ba públiku iha 2020. Nune’e, ema bele hatene katak UNPAZ halo ona buat barak,” nia dehan.

Jornalista   : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here