Atleta Timor-oan husi Federasaun Taekwondo, Imbrolia de Araújo dos Reis Amorin, ne'ebé hetán primeiru medalla iha SEA Games Filipina 2019. Imajen/Foti husi Google

DILI, 20 dezembru 2019 (TATOLI)—Governu liuhusi Sekretáriu Estadu Juventude no Desportu (SEJD) apoia montante orsamentu $350,000,00 ba Comitê Olímpico Nacional de Timor-Leste (CONTL) hodi organiza nesesidade partisipasaun Timor-Leste nian iha eventu internasionál SEA Games Filipina 2019.

Segundu Vise Prezidente CONTL, Vicente  Carvalho da Silva (tau jaz metan) hamutuk ho delegasaun Timor-Leste partisipa iha abertura serimonia SEA Games Filipina 2019. Imajen/Foti husi Google

Partisipasaun Timor-Leste nian iha SEA Games Filipina ba dala-30 ne’e ho nia ekipa hamutuk ema nain 94, kompostu husi ofisial nain 20 no atleta nain 74 mai husi modalidade desportiva 12.

Durante sira nia prezensa iha SEA Games, ne’ebé hahú husi loron 30 novembru to’o 11 dezembru 2019, CONTL hanesan organizadór ba partisipasaun Timor-Leste nian eventu SEA Games ne’e ‘atribui’ osan ‘bolsu’ nian ba atleta sira ida-idak hetan $700,00 no ba ofisial sira $650,00.

Segundu Vise Prezidente CONTL, Vicente  Carvalho da Silva, liuhusi entrevista ho Ajénsia TATOLI iha nia Edifísiu CONTL, Dili, kinta (19/12/2019), hateten katak, partisipasaun TL  nian iha SEA Games Filipina, tinan ne’e, hatudu prestasaun di’ak, mezmu iha fallansu ki’ik balun, liuliu limitasaun orsamentu. Ho nune’e, CONTL jere apoiu orsamentu $350,000,00 husi SEJD  atu bele fasilita tiketi Dili-Denpasar-Filipina no Filipina-Denpasar-Dili,  akomodasaun durante prezensa, farda, sapatu, meias, han-hemu iha loron sábadu ho domingu, no fasilita insentivu $700,00 ba  kada atleta.

“Ami hakarak fó atleta sira nia insentivu hanesan mós ho grau DSA (Daily Subsistence Allowance) ka perdiem viajen estranjeiru kada loron $120,00 ba Filipina. Maibé, ami nia kbiit la to’o no ami tenke jere apoiu osan SEJD nian ho montante $350,000,00 ba nesesidade ita nia partisipasaun no insentivu ba atleta ho ofisial sira,” esklarese Vicente Carvalho da Silva, nu’udar mós prezidente Federasaun Alterofilizmu Kultura e Peko Timor-Leste  (FHACUPTIL-sigla portugés).

CONTL rekoñese orsamentu ba eventu SEA Games Filipina ki’ik kompara ho partisipasaun Timor-Leste nian iha eventu internasionál sira tinan hirak  liu-ba, maibé la sai obstákulu ba  atleta sira ho CONTL atu organiza malu to’o final partisipasaun delegasaun Timor-Leste nian iha Filipina.

Ho osan insentivu $700,00 la fó implikasaun ba nesesidade atleta nian tanba tuir Vicente Carvalho da Silva, osan insentivu ne’e uza ba de’it atleta nia presiza privadu. Entretantu, fasilidade no presiza sira kona-ba kompetisaun, han-hemu no  otél, CONTL mak kobre hotu kedas.

Sekretáriu Estadu Juventude no Desportu, Nélio Isaac Sarmento. Imajen/António Gonçalves

Liuhusi entrevista ketak ida ho Sekretáriu Estadu Juventude no Desportu (SEJD), Nelio Isaac Sarmento, rekoñese katak,  parte Governu liuhusi SEJD aloka orsamentu $350,000,00 ba CONTL ho alvu partisipasaun Timor-Leste nian iha SEA Games Filipina.

“Governu apoia orsamentu ho montante refere ba CONTL atu jere oinsá mak bele sufisiente ba nesesidade partisipasaun TL nian iha SEA Games. Atu to’o ka la to’o, ida ne’e mak Governu nia esforsu. Agora atu jere oinsá kabe ba kompeténsia tomak CONTL nian no Governu la bele impoin ba órgaun independente hanesan CONTL,” afirma Nelio Isaac Sarmento.

Nelio Isaac Sarmento, konsidera, osan ne’ebé Governu aloka ba CONTL hodi partisipa iha eventu SEA Games sufisiente no tuir nia haree, insentivu $700,00 ba kada atleta ne’e razoavel hela, tanba nesesidade hotu ba atleta sira durante iha Filipina kobre hotu husi CONTL.

“Osan $700,00 ne’e ba direta atleta sira ida-idak nia bolsu. Sira sei la gasta ba han-hemu no toba fatin ou farda ka sapatu. Han-hemu ho nesesidade durante partisipasaun iha SEA Games responsabilidade CONTL nian. Ne’e ba ha’u katak insentivu $700,00 ne’e sufisiente hela,” haktuir Nelio Isaac Sarmento.

Nia dehan, normálmente CONTL lori atleta sira ba partisipa iha eventu internasionál ba interese Estadu nian sempre konsidera subsídiu ba atleta sira no nia mekanizmu oinsá ne’e depende ba kalkulasaun husi CONTL.

Modalidade 12 husi kontinjente Timor-Leste iha SEA Games Filipina, kompostu husi modalidade Taekwondo ho nia atleta nain hitu (7) no ofisial nain rua (2), Karate-Do (atleta 4 no ofisial 2), Shooting (atleta 2 no ofisial 1), Pencak Silat (atleta 3 no ofisial 1), Boxing (atleta 4 no ofisial 2), Weigtlifting (atleta 3 no ofisial 2), Tennis (atleta 2 no ofisial 1), Cycling (atleta 2 no ofisial 1), Athletic (atleta 6 no ofisial 2), Swimming (atleta 2 no ofisial 1), football (jogadór 20 no ofisial 4) no Beach Volleyball (atleta 4 no ofisial 2).

Hetan Medalla Osan Metan  Lima no Osan Mutin Ida

Atleta husi Modalidade Taekwondo, Imbrolia de Araújo dos Reis Amorin. Imajen/Foti husi Google

Partisipasaun no prestasaun Timor-Leste nian iha SEA Games Filipina ne’e bele hetan prestasaun di’ak kompara ho partisipasaun Timor-Leste nian iha eventu SEA Games iha tinan sira liu ba. Tanba iha tinan ne’e, atleta Timor-oan sira konsege hetan medalla osan metan (bronze) lima (5) ho medalla osan mutin (silver) ida (1).

Medalla osan mutin (silver) ne’e oferese mai Timor-Leste husi prestasaun atleta Ana da Costa da Silva Pinto Belo (Taekwondo), inklui medalla osan metan (bronze) tolu (3) seluk  oferese mós husi modalidade Taekwondo ho prestasaun no dedikasaun atleta Luisa dos Santos Rosa, Imbrolia de Araújo dos Reis Amorin ho Bonifacio da Silva Lobo.

Medalla osan metan (bronze) rua (2) seluk oferese mós husi atleta husi modalidade Boxing mak hanesan Frederico Soares Sarmento ho José Barreto Quintas da Silva.

Ba prestasaun ne’ebé atleta husi Federasaun Taekwondo ho Boxing hetan ne’e, Sekretáriu Estadu Juventude no Desportu (SEJD), Nelio Isaac Sarmento, komenta katak, partisipasaun atleta Timor-Leste nian iha SEA Games fó rezultadu di’ak, tanba Governu nia alvu la’ós medalla osan mean, maibé pelumenus iha osan metan no ikus mai atleta  bele  hetan duni osan mutin (silver) ida ho osan metan (bronze)  lima.

“Ita iha etapa  di’ak no orgullu liu tan tanba Governu iha alvu mak federasaun tolu bele hetan medalla mak hanesan Atletizmu, Taekwondo ho Boxing. Mezmu, Atletizmu kuaze la hetan rezultadu  maibé Taekwondo ho Boxing hetan  rezultadu,” Nelio Isaac hateten.

Intermus alvu, Nelio Isaac tenik, Governu apoia $350,000,00 ba CONTL konsege hetan duni alvu balun, tanba ne’e, espera katak iha eventu internasionál SEA Games iha Vietnam 2021, atleta Timor-Leste bele iha alvu lubuk ida, tanba ne’e,  presiza iha preparasaun ne’ebé naruk uitoan.

Ba Federasaun rua ne’ebé hetan medalla hanesan Boxing ho Taekwondo, SEJD fiar no garante  sei hetan atensaun espesiál intermus treinamentu no preparasaun kompara ho federasaun sira seluk.

27 Dezembru, Estadu Selebra Serimónia Apresiasaun

Estadu liuhusi Governu no Sekretária Estadu Juventude Desportu (SEJD), sesta (27/12/2019),  sei selebra serimónia ofisial atu atribui apresiasaun prémiu ba atleta ne’ebé hetan prestasaun hanesan Ana da Costa da Silva Pinto Belo, Luisa dos Santos Rosa, Imbrolia de Araújo dos Reis Amorin ho Bonifacio da Silva Lobo husi Federasaun Taekwondo ho atleta Frederico Soares Sarmento ho José Barreto Quintas da Silva husi Federasaun Boxing ne’ebé oferese ona medalla osan mutin ho osan metan mai Timor-Leste.

Sekretáriu Estadu Nelio Isaac Sarmento, hateten, SEJD sei konvida fali federasaun desportiva sira hotu no atleta sira ne’ebé manan medalla, inklui sira  nia família atu hola parte iha serimónia atribuisaun prémiu ne’e iha SEJD.

Atribuisaun prémiu ne’e bazeia ba Diploma Ministerial  ne’ebé fó sai ona iha 2017 ho  nia kalkulasaun  ne’ebé definidu iha Diploma ne’e nia laran.

Nelio Isaac esplika, tanba atleta sira ne’ebé manan medalla la korresponde ho Diploma Ministerial nian,  tanba ne’e mak atribuisaun prémiu husi Governu ba atleta sira  bazeia ba kondisoens ne’ebé iha. Ezemplu, ba Atleta  Ana da Costa da Silva Pinto Belo ne’ebé manan medalla osan mutin  sei hetan prémiu osan $5000,00 no nia treinadór sei hetan $2500,00 no atleta ne’ebé mana medalla osan metan, ida-idak sei hetan $3000,00 nia treinadór  sei hetan $1500,00.

SEJD Dezafia Federasaun Desportiva sira

Iha oportunidade ne’e, Sekretáriu Estadu Nelio Isaac Sarmento, dezafia federasaun desportiva sira iha kapasidade no atensaun másima ba organiza federasaun no atleta sira. Ezemplu, se federasaun desportiva ida la konsege organiza ninia atividade iha nasionál mas hakarak husu ba Governu  ou obriga CONTL lori nia atleta ba partisipa iha eventu internasionaís, atu hatudu de’it katak, bele gasta orsamentu ba sira nia partisipasaun mas la iha prestasaun ida mak Timor-Leste hetan.

“Ha’u dehan dezafiu ne’ebé ita tenke haree ba oin maka federasaun sira tenke hadi’a sira nia federasaun hodi organiza atividade desportiva atu bele hetan atleta di’ak. Seluk fali, CONTL tenke kolabora ho Governu atu halo analiza ida detallu  ba partisipasaun federasaun sira nian iha eventu internasionál. Ezemplu, ita lori modalidade mak barak liu ka ita lori modalidade  natoon de’it mas hetan prestasaun di’ak. Ita la bele lori federasaun hotu-hotu ba hodi gastu osan boot mas la hetan rezultadu,” hateten Nelio Isaac Sarmento.

Partisipasaun TL nian iha SEA Games, tinan-tinan, Nelio Isaac hatutan, fó biban ba CONTL atu halo ezame konsiénsia para identifika loloos atu tinan sira tuir mai tenke fokus. Ezemplu Federasaun Taekwondo ho Boxing hatudu ona prestasaun iha SEA Games Filipina, maka iha SEA Games 2021 nian CONTL tenke foku atensaun iha treinamentu no fasilidade atu tinan sira mai Federasaun Taekwondo ho Boxing bele hetan medalla osan mean.

Ba federasaun ne’ebé seidauk hetan medalla, SEJD propoin hadi’a  di’ak  liu tan ninia mekanizmu, fasilidade no treinamentu ba nia atleta sira, inklui nia treinadór sira.

Jornalista       : Francisco Simões

Editór             : Xisto Freitas

HAKEREK NO HATÁN

Please enter your comment!
Please enter your name here