Treinadór AS Marca, Romão Guterres. Imajen/LFA

DILI, 20 dezembru 2019 (TATOLI) – Treinadór klube AS Marca FC, Romão Guterres, sente orgullu bele lori ekipa ne’ebé nia lidera, promovidu ba segunda divizaun Liga Futeból Amadora (LFA) époka 2020.

“Nu’udar Treinadór, senti orgullu tanba bele lori ekipa AS Marca promovidu ba segunda divizaun époka 2020. Parte seluk, hanesan ekipa foun ne’ebé foin mai rejistu iha terseira divizaun LFA nian, ami senti kontenti tebes tamba bele kompete ho ekipa sira ne’ebé esperiensia iha liga ona hanesan YMCA no ADR União”, tenik Romão ba Agência Tatoli, sesta ne’e.

Nia dehan, antes ne’e bainhira AS Marca halo preparasaun, mosu difikuldade barak liu-liu iha finanseiru, maibé ho esforsu ne’ebé iha ikus hetan duni susesu.

“Uluk bainhira ami atu ba rejistu iha LFA hodi kompete, ami iha difikuldade oituan kona-ba finanseiru no ami buka jeitu hodi konsege ultrapasa duni. Jogadór ne’ebé hamutuk ho ha’u foin hetan oportunidade dahuluk hodi ba joga iha liga, ho nune’e ha’u tenki esforsu maka’as hodi prepara sira hotu molok ba tuir kompetisaun”, nia akresenta.

Romão subliña, klube iha nafatin konfiansa ba nia hodi sai hanesan treinadór prinsipál iha tinan oin.

“Ha’u sei mantein nafatin no diresaun klube AS Marca fó fiar nafatin ha’u atu lidera jogadór sira iha époka 2020”, dehan treinadór jerasaun Baucau ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here