Governu liuhusi MSSI selebra Natal ho Tinan Foun hamutuk ho prezu sira. Imajen/Domingos Piedade

DILI, 20 dezembru 2019 (TATOLI)-Ministra Solidariedade Sosiál no Inkluzaun, Armanda Berta dos Santos, sesta (20/12/2019), selebra Natal no Tinan Foun hamutuk ho dadur nain 120 ne’ebé kumpre hela sira nia sentensa iha Prizaun Gleno, Munisípiu Ermera.

Notísia Relevante : MSSI Natal Hamutuk ho Dadur 573 iha Prizaun Becora

Liuhusi nia diskursu, Ministra Armanda Berta dos Santos, afirma,  prizaun la’ós fatin kastigu, maibé hanesan fatin reflesaun hodi muda ema nia hanoin, ema nia atitude no ema nia karaterístiku moris.

Natal hamutuk  ho tema “Ho Prezensa Meninu Jesus nian bele hametin liután ita nia fiar”, oinsá hatudu Governu nia sentidu solidariedade profunda nu’udar umanu atu prizioneiru sira labele sente mesak iha ambiente ida ne’ebé nakonu ho kontrolu.

“Liuhusi selebrasaun Natal no Tinan Foun ida ne’e, espera katak sei lori domin no dame ba ita ida-idak ho ita nia família tomak,” Armanda Berta dos Santos tenik.

Nia subliña katak, prizioneiru la’ós ema kriminozu, maibé tanba nesesidade mak obriga no tenke halo buat ne’ebé la monu ba ema hotu nia hakarak.

Diretór Nasionál Estabelesimentu Prizaun Gleno, Nito Maria dos Santos, apresia ho MSSI ne’ebé kada tinan sempre selebra Natal hamutuk ho dadur sira prizaun tolu; Dili, Gleno no Suai.

Selebrasaun  Natal no Tinan Foun hamutuk ne’e  akompaña mós ho misa agradesimentu ne’ebé partisipa husi reprezentante Ministériu Justisa, autoridade munisípiu, autoridade seguransa, família dadur no konvidadu sira seluk tan.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here