Prezidente Repúblika, Francisco Guterres Lú Olo. Imajen Tatoli/António Gonçalves

DILI, 20 dezembru 2019 (TATOLI)– Prezidente Repúblika (PR), Francisco Guterres Lú Olo, husu kombatente sira hotu atu Hatuur istória tuir faktus.

“Jerasaun foin-sa’e tenke hatene istória ida ne’e. Ha’u husu ba kombatente hotu atu hatuur istória ne’e tuir faktus. Ba foin-sa’e sira no mós ba instituisaun sira ne’ebé memoraliza istória hanesan CHEGA no Muzeu Rezisténsia. La iha Povu sein memória”, diskursu PR Lú Olo iha Kongresu Nasionál Kombatente Libertasaun Nasionál, iha Sentru Konvensaun Dili (CCD), sesta ne’e.

Xefe Estadu hatutan: “Ita nia futuru la prevee, tanba ne’e ita harii dadaun ona no haree ba ita-nia istória! Nune’e, ita tenke valoriza ita-nia pasadu no dalan ne’ebé ita liu ona atu bele hare’e ba futuru”.

Nune’e, nia husu atu sidadaun hotu presiza valoriza mós servisu ne’ebé Komisaun Instaladora no Komisaun Organizadora halo hodi permite realizasaun kongresu dahuluk no husi ne’e ba oin bele hala’o asosiasaun ida atu tau matan ba patrimóniu istóriku no ajuda Estadu Timor-Leste diversifika ekonomia.

Aman Nasaun nee optimista katak oras ne’e kombatente sira la’o dadaun iha dalan atu hadi’a-an nafatin no atu konsellu ne’e ajuda Estadu Timor-Leste valoriza Rezisténsia, tuir artigu 11 Konstituisaun RDTL haruka.

“Husi Frente Armada, Frente Klandestina no Frente Esterna-Diplomátika! Ha’u mai husi Frente Armada. Ho estima no amizade, mak ha’u haree fila fali kombatente sira ne’ebé luta no mehi hamutuk ho ha’u, iha tinan rua nulu resin haat nia laran”, nia realsa.

PR Lú Olo rekoñese katak hamutuk ho mártir sira, eroína no erói sira, mak halo istória Libertasaun Nasionál Timor-Leste nian ne’ebé istória ne’e hahú no halo husi FRETILIN no FALINTIL no halo mós husi CRRN, CNRM no CNRT.

Alende ne’e, nia dehan, nasionalista no organizasaun hotu iha relasaun ruma ho komponente rezisténsia lima no husi perkursu ne’e mak Timor-Leate ne’e hetan ukun rasik-an.

“Ita hamutuk horiuluk, tanba ne’e ita tenke hamutuk ohin loron. Bainhira ita hamutuk, ita dignifika sira ne’ebé mate ona no ita sei hatene oinsá dignifika kombatente sira ne’ebé sei moris ohin loron.

Nia dehan, hamutuk ne’e mai husi ko’alia ba malu atu hetan dalan ida di’ak liu ba Kombatente hotu no ohin iha ambiente demokrátiku no livre mak Kombatente sira tuur hamutuk atu fó naroman ba moris ohin loron no ba oin, liuhusi dignifika no valoriza pasadu.

Xefe Estadu dekara katak, Estadu hatudu ona hodi fó atensaun ba Kombatente Libertasaun Nasional hahú ho Konstituisaun RDTL no bainhira hamosu Estatutu ba Kombatente Libertasaun Nasionál iha 2006, liuhosi Lei n° 3/2006, altera dahuluk liuhosi Lei n° 9/2009 nobaltera daruak, liuhosi Lei n° 2/2011.

Nia hatutan, alterasaun daruak ne’e mak fó dalan hodi harii Konsellu Kombatente Libertasaun Nasionál, nu’udar órgaun ida atu reprezenta interese Kombatente hotu nian.

Dekretu-Lei n° 7/2018, ne’ebé propoin husi VII Governu no Xefe Estadu rasik promulga, iha loron 21 marsu 2018 mak fó dalan atu hamoris estrutura, ho objetivu no kompeténsia sira ba Konsellu Kombatente Libertasaun Nasional nian ne’ebé sei harii ho dirijente sira ne’ebé mai husi Frente tolu, ne’ebé horiuluk hatene hametin-an, fó forsa no matenek ba malu, ba mehi koletivu ida: Liberta Pátria no Liberta Povu.

“Nune’e, ho forsa lei nian, mak kongresu ne’e halo, atu eleje órgaun nasionál ba Konsellu Kombatente Libertasaun Nasionál. Konselllu ne’e mak sei fó mahon ba ita hotu-hotu, nu’udar asosiasaun kombatente libertasaun nasionál sira-nian”, nia subliña.

Tuir Dekretu- Lei, ne’ebé Xefe Estadu promulga hatete katak, mai kongresu ida ne’e delegadu lima husi munisípiu ida-idak no membru tolu, hili husi organizasaun kombatente ida-idak.

Tanba ne’e nia dehan, kongresu ne’e sei ramata ho responsável ba órgaun nasionál na’in-lima.

“Ha’u fiar katak, Kombatente neebé kongresista sira sei hili ba órgaun nasionál sei hatene onra sira-nia kompromisu atu servi kombatente hotu, la hasees ema ne’ebé de’it atu ajuda Estadu Timor-Leste dignifika loloos sira ne’ebé fó-an tomak ba Pátria no Povu”, Xefe Estadu realsa.

Nia fó sai katak, konsellu ne’e asosiasaun públika ida ho kbiit konsultivu ba Governu no iha objetivu atu promove no defende direitu no devere kombatente sira-nian, atu promove dezenvolvimentu sustentável nasional, pás no estabilidade sosial ba país Timor-Leste

Nune’e mós, promove no onra memória Resisténsia Timorense, hasa’e liután prestíjiu kombatente sira-nian, promove valór rezisténsia ba jerasaun foin-sa’e, no ezerse poder ne’ébé Estadu fó ba Konsellu Libertasaun Nasionál.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here