DILI, 20 dezembru 2019 (TATOLI) – Deputadu Bankada PLP, Francisco de Vasconcelos, hateten bainhira Governu iha nosaun remodelasaun, ne’e kompeténsia konsellu direta koligasaun partidária Aliansa Mudansa ba Progresu (AMP) nian ho Primeiru-Ministru.
Iha 16 novembru, AMP ne’ebé kompostu hosi partidu CNRT, PLP no KHUNTO, halo Konferénsia Nasionál daruak ho finalidade hasai rezolusaun, ne’ebé iha pontu balun temi AMP konsidera bainhira iha nosaun remodelasaun husi Governu.
“Bankada PLP laiha objesaun ba kualkér remodelasaun, maibé atu halo remodelasaun tenke halo avaliasaun. Avaliasaun ne’e mai hosi partidu no ida seluk mai hosi Primeiru-Ministru hanesan Xefe Governu”, tenik Deputadu PLP iha resintu Parlamentu Nasionál (PN), sesta ne’e.
Tuir deputadu ne’e, Xefe Governu mak avalia membru governu sira no deskuti ho lideransa partidu hafoin halo remodelasaun.
“Kuandu ita dehan remodelasaun ne’e nesesáriu, tenke mai ho avaliasaun tanba ita labele tau ema hafoin ita hasai ema tuir ita-nia hakarak”, nia akresenta.
Xefe Bankada CNRT, Duarte Nunes, konsidera remodelesaun ne’e kompeténsia Primeiru-Ministru.
“Remodelasaun hotu-hotu ejize, inklui PLP mós ejize. Ita espera katak Governu bele konsidera hodi akontese remodelasaun. Espera bele akontese, maibé Primeiru-Ministru mak tetu remodelasaun ne’e. Agora Primeiru-Ministru nia partidu rasik mós ezije, Ita hein saida mak akontese”, Deputadu ne’e argumenta.
Nune’e mós, Deputada Bankada KHUNTO, Olinda Guterres, rekoñese nosaun remodelasaun ne’e importante, nune’e governasaun bele la’o ho progresivu.
“Primeiru-Ministru ko’alia ho Deputadu balun dehan remodelasaun ne’e bele akontese”, Deputada Olinda haktuir.
Jornalista: Evaristo Soares Martins
Editór: Xisto Freitas
